Газетым уло кумылын лудына

Мый Шаран район Усола школышто 32 ий туныктышылан тыршем. Туныктышо пашамым кӱкшын акленыт - «Башкортостан Республикысе образованийын отличникше» лӱмым пуэныт, шукерте огыл «РФ образованийын почетный пашаеҥже» лӱмым налынам, кӱкшӧ категориян туныктышо улам. Школышто тунемше-влаклан уло виемым, тыршымашемым пуэм - марий йоча-влакым мураш, кушташ, шочмо йылмым йӧраташ туныктем. Нуно тӱрлӧ конкурслаште вийыштым тергат, ончыл верлам наледат. Шкежат 27 ий утла «Ош пеледыш» калык ансамбльым вуйлатем. Школышто тӱрлӧ марла мероприятийым эртарена. Тунемше-влак дене «ЧОЛМАН» газет нерген устный журналым ямдылышна. Газет гыч нуно статьям, почеламутым, саламлыме мут-влакым лудыч.

Ешна дене газетым уло кумылын лудына, газетлан шушаш идалыкланат возалтна. Мый шкеже тиде газет гыч шуко материалым палымем, Благовещенск педучилищыште пырля тунемме йолташем-влак нерген лудам, тыгак Мишкан районысо «Ӱжара» ансамбль нерген пален шогем да нунын дене кугешнем.

Шаран районышто илыше марий калыклан шкенан шочмо йылме дене лекше «Чолман» газетлан подпискым ышташ темлем.

Л. ШАМЫКАЕВА.