Фольклор пайремым эртарышна

Чылаже 11 марий коллектив толын. Маняк, У Пураял, Пӱрнӱш, Шушнур, Такия, Кутлинка, Корий, Тумерсола, Раздолье ялла да Коян села гыч марий фольклор коллектив-влак шке мастарлыкыштым ончыктышт. Унам сайын вашлияш манын, тыгай годым поро марий йӱланам шуктыман. Клуб пашаеҥ-влаклан ялысе активист-влак дене пырля пайремлан ончылгоч тыршен ямдылалташ логале. Тыгай пашам шукташ ӱшаненыт гын, вашлийше-влак могырым арулык, чаткалык, моторлык дене пырля поро кумылымат ончыктыман. Ялын, калыкнан йӱлаж ден тӱвыражым, клубнам сай могырым ончыкташ тыршышна. Пайрем годым буфет пашам ыштыш. Верысе ялсовет администраций вуйлатыше К.К. Зайнакаева, районысо тӱвыра полатын директоржо Э.А. Мухатаева погынышо калыкым саламлышт. Марий вургем-влак нерген Йывангасола школын туныктышыжо Н. Фёдорова пеш устан ойлен пуыш. Мурымаш-куштымаш пайремым сӧрастарыше коллектив-влакым пӧлек дене ужатен колтышна.

Л. АЛЫНБЕКОВА, Йывангасола клуб вуйлатыше.