Братский ГЭС-ым чоҥымаште тыршен

Янсубай - Ярминган кокымшо эргыже. Изинекак пашалан шӱмаҥ кушкын, школышто сайын тунемын, авиамодельный кружокыш коштын, книгам лудаш йӧратен. Школ гыч мӧҥгӧ толмо корнышто почеламутым тунемынат шукта ыле. Икте-весе дене книган содержанийже, сай да начар койышан герой-влак нерген мутланенна. Кудымшо-шымше класслаште тунемме годым клубышто художественный самодеятельностьым организоватлышна. Тудым Янсубай вуйлатен. Кугу пайрем-влаклан спектакльым, мурым, куштымашым, почеламутым ямдылен ончыктышна. Пешат сайын модыч пьесын геройжо-влакым, почеламутым лудын пуаш, мураш тале ыльыч Борис Шамшиев, Костя Илинбаев, Олег Ямбаев, Дмитрий Ямуков, Пазила Андреева, Ольга Саптиярова, Аня Микайдарова да моло-влакат.

Школым тунем лекмек, шуко ӱдыр-рвезе колхозыш пашаш тӱҥале. Янсубай фермыште пашам ыштыш. Армийыште служитлыме жап шумек, военкомат Янсубайым, Ямбай Олегым Военно-Морской флотыш колтыш. Янсубай, тунемме курсышто крейсерын рулевойжо специальностьым налын, Тихоокеанский флотышто служитлаш тӱҥале. Туштат художественный самодеятельностьышто мастарлыкым ончыктен. Флотышто сайын служитлымыжлан ятыр поощренийым налын, ик тылзылан отпускыш колтеныт ыле. Служба срокшо мучашке шумек, армийысе йолташыже-влак дене пырля Братск олаш гидроэлектростанцийым чоҥаш каен. Нуным баракыш илаш пуртеныт. Мӱндырнат огыл верланыше ик пачашан столовыйыш кочкаш коштыныт.

Тӱҥалтыш жапыште тӱрлӧ пашам шуктеныт, отбойный чӧгыт дене ышташ логалын. Тунам техника шагалрак улмаш. Ик жап гыч Янсубайым Братскгэсстройыш бригадирлан кусареныт. 1961 ийыште Вера дене палыме лийын, мужыраҥыныт. Нунылан Береговой уремыште пачерым пуэныт. Идалык гыч Таня ӱдырышт шочын.

Янсубай пашам тыршен ыштен, ончыкылык нерген шонен. Институтыш тунемаш пураш ямдылалтын. Мый декем тылзе сайын возымо серышыштыже шке илышыж нерген каласкала ыле. Но чыла шонымашыжым шуктен ыш керт. Янсубай, шодо чер дене черланен, 1963 ий 24 октябрьыште ош тӱня дене чеверласен.

1961 ийыште Янсубайынат чоҥымо гидроэлектростанцийын ныл агрегатше тулым пуаш тӱҥалын.

Н. ИРГУБАЕВ.

Снимкыште: Я. Ярмингин (скрипкым шокта) салтак йолташыже-влак дене пырля.