Пайремнам шыжылан пӧлеклышна

Кажне пагыт шке семынже чесле, мо дене гынат айдемым куандара. Шыжымат чылан йöратат - тудо пеш мотор да шуко поянлыкым конда.

«Шöртньö» пагытым йöратымыштым еҥ-влак сылнымут, тÿрлö концерт, мероприятийла гоч ончыкташ тыршат. Раевка тÿҥалтыш школын тунемшыже да йочасадыш коштшо йоча-влакат «Шыже пайремым» эртарышт. Чевер шыже кечын школышто пеш ямле да весела ыле. Молан манаш гын изи артист-влак тиде пайремыште шке усталыкыштым ончыктышт - чапле мурым йоҥгалтарышт, почеламут-влакым сылнын лудыч, мотор куштымашым ончыктышт, шыжын поянлыкше нерген оҥай тушто-влакым туштышт.

Йоча-влакын ава-ачаштат пайрем деч öрдыжеш ышт код. Нуно икшывышт дене пырля пакчасаска, емыж гыч тÿрлö-тÿрлö оҥай кидпаша-влакым ямдылышт. Мо гына уке ыле?! Йöратыме мультфильм гыч Маша ден Маскат ыльыч, эсогыл улитке нушкын толын! Мемнан калык пеш уста. Теве корабльымат чоҥен моштат: пайремыш пуш дене коля, черепаха, шоҥшо игыж дене, шукш-влак «ийын толыныт». А мыняр тÿрлö мотор деч мотор пеледыш аршашым вазыш шындыме?! Шыже пайрем кужу жаплан шарнаш кодеш. Тудо чылалан келшен! Тынар тыршымыштлан йоча да ава-ача-влаклан пеш кугу таум каласыме шуэш.

Н. ШАМАГУЛОВА, Раевка ялысе тӱҥалтыш школын - Я. Ялкайн лӱмеш марий гимназийын филиалжын - тӱҥалтыш класслаште туныктышо.