Марий тӱвыра тылзе тӱҥалеш

4 ноябрь кастене Башкортостаныште «Искусство йӱд» Всероссийский тӱвыра акций тӱҥалеш. Тений тиде кечылан «1917 ий да Башкортостан», «Экологий да посна аралыме пӱртӱс кумдык-влак идалык», «Калык-влакын икоян улмо кечышт» тема-влакым ойырен налме.

Нефтекамскысе историй да краеведений музейыште ты акцийлан пӧлеклыме кечын, 4 ноябрьыште 18 шагатеш, эше Марий тӱвыра тылзылан тӱҥалтышым ыштат. 1917-ше ийысе событийла дене марий-влакын илышыштат моткоч чак кылдалтын, садлан тений Икымше Марий съездлан 100 ий темме нерген мутланымаш тӱҥ верым налеш. Варажым творческий коллектив-влак погынышо калыклан икмыняр художественный номерым пӧлеклат.

Марий тӱвыра тылзе кечылаште школлаште, йочасадлаште ятыр мероприятийым эртараш палемдыме. 10 ноябрьыште Оласе тӱвыра рӱдерыште (ГЦК) Йошкар-Ола гыч «Марий кундем» кугыжаныш семӱзгар оркестрын шоктымо почеш эстрада мурызо-влакын концертышт лиеш. Молгунамсе семынак, ты тылзым 1 декабрьыште Регион-влак кокласе марий тӱвыра фестиваль дене иктешлат.