Лу ийыште могай вашталтыш лийын?

2016-шо ийысе Всероссийский ял озанлык переписьын иктешлымашыж гыч раш коеш: пытартыш лу ийыште ял озанлыкыште кугу вашталтыш лийын.

2016 ий 1 июльлан Россий Федерацийыште 36 тӱжем ял озанлык организаций, 137 тӱжем кресаньык (фермер) озанлык, 38 тӱжем индивидуальный предприниматель, 23 миллион личный подсобный да еҥ-влакын шкеныштын озанлыкышт, граждан-влакын 76 тӱжем коммерческий огыл объединенийышт шотлалтыныт. 2006-шо ий дене таҥастарымаште, личный подсобный озанлык да индивидуальный предприниматель-влакын чотышт гына утыжым вашталтын огыл, моло тӱшкаш пуртымо озанлык-влак шагалемыныт.

Лу ий коклаште ял озанлык пашам шуктышо организаций 69 гыч 76, кресаньык (фермер) озанлык-влак 50 гыч 66 процент марте артеныт, ял озанлык производство дене заниматлыше личный подсобный озанлык 86 гыч 79, граждан-влакын коммерческий огыл объединенийышт 93 гыч 89 процент марте шагалемыныт.

Тӱрлӧ шотан озанлыклаште ӱдымӧ кумдык 6 процентлан ешаралтын, тыгодым технический (54 процентлан), пырчан да пырчан-отызан (8,5 процентлан) кушкылым шукырак ӱдат, но пареҥгым (32,6 процентлан), кургылык кушкылым, пакчасаскам шагалрак ончен куштат.

Озанлыклаште тӱкан кугу вольык чумыр шотышто 18 процентлан шагалемын. Личный подсобный озанлык ден граждан-влакын коммерческий огыл объединенийышт деч молыштыжо сурткайыкым 42 процентлан шукырак ашнаш тӱҥалыныт. Ял озанлык организацийлаште 2,4 пачаш шукеммылан кӧра чумыржо сӧсна чот ик кумшо ужашлан, шорык да каза 21 процентлан артеныт.

Всероссийский ял озанлык переписьым иктешлыме почеш пашаеҥ чотым, нуно могай озанлыклаште тыршымым, мланде дене кузе пайдаланымым, кушто мом ӱдымым, мыняр вольыкым ашнымым, технический средства чотым да молым радамлаш лиеш. Октябрь тылзыште Росстат Всероссийский ял озанлык переписьым иктешлыме негызеш икымше изданийым савыктен, ноябрьлан весым ямдыла. 2018 ийыште чыла иктешлымашым кандаш том дене лукташ шонат. Росстатын официальный да верысе орган-влакын сайтыштышт кажне томын электрон версийжым вераҥдат. Нуным кажне еҥ лудын кертеш.

Э. АПТУЛМАНОВА.