Весела да писе улыт

Илалше-влакын кечышт лӱмеш У Пураял клубышто эртарыме мероприятийыш тений 70 утла еҥ погыныш. Ял поселений вуйлатыше Р.А. Сайфутдиаров нуным шокшын саламлыш да шуко поро мутым ойлыш.

Вара концерт номер-влакым ончыктышна. Мемнан клубысо «Локама» ансамбль ялт «Бурановский кова-влак» гаяк, можыч, сайракат кертеш, таклан огыл вет «Пураял кова-влак» улыт. Концертнам тугак ял поселений вуйлыкна Расим Аблкасимович, Яна Афкаликова да Венера Кузьмина мотор мурышт дене сӧрастарышт, моло номерымат ямдыленна ыле. Библиотека вуйлатыше Э.В. Шамыкаева «Кӧ эн писын азам пӱтыра», «Кӧ эн писын уныкажым школыш пога», «Кӧ эн писын мундырам мундырта» да моло весела конкурсым тарватыш. А тулеч ончыч «Эн тутло сий» конкурсым увертаренна ыле. Тӱрлӧ сийым озавате-влак пӧртыштак кӱктен конденыт. Чылаштлан пӧлекым кучыктышна.

Вара унана-влакым чай йӱаш ӱжна. Илалше-влак шкеныштын поро тыланымашыштым ойлышт, ончыкыжат тыге погынаш каҥашышт.

Л. ШАМШУКОВА.

Авторын колтымо фото.