«ОБЕЗЬЯН-ВЛАК КОЧКЫНЫТ»

Ковам пуэн колтымо окса дене авам кевыт гыч бананым налын тольо. Сумкаж гыч ӱстембак луктын пыштыш. Мый пеш куаненам. Иктыжым авызлаш кидемат шуялтенам ыле - аван чарга йӱкшӧ чарыш: «Ит тӱкӧ! Але эр. Мӱшкырет шужымек кочкат!» «Мӱшкырем мыйын кызытак шужен...» маннем ылят, тиде татын ача толын пурыш. Тудат ӱстел деке лишеме. Йолаш кӱсенже гыч арака кленчам вушт шӱдырал лукто. Шӱдырал лукто да авамын пыштыме банан пелен шолт шындыш. Ӱмбакше мыйын тӱткын кӱтымем ужын, ачам карал шындыш: «Пшол тышеч! Курж модаш!»

Куржашыжак шым курж. Кудывечышке лектым. Модмо ыш шу. Ушыштем ӱстембалан кодшо бананак. Вот авам кычкыралеш: «Вовук, пуро! Бананет коч!» - шонен вучем.

Шарик пийна дене модым, Вӧдaси кувайын ялыш кайымыжым эскерышым. Жап ятыр эртымыла чучо. Мӱшкыремат ала-мыняр пачаш шужен, бананым кочкаш лач веле, шоналтен, пӧрт омсам эркын почым. Ачам уке. Ала-кушко каен. Авам коҥга воктен шогылтеш. Мый вик ӱстел дек ошкыльым да ончальым. Но ӱстембалне банан ыш кой. Кийыме вержым ниялтенат ончышым - садак уке. Ачан кленчажат йомын.

- Авай! - кычкыральым чон йӧсем дене.

- Мом кычкырлет?! - аван торжа йӱкшым гына кольым, шкенжым ончалаш вуемат нӧлтал шым сеҥе.

- Банан... Бананже кушто?!

- «Кушто-кушто», - оҥарен пелештыш авам. Изиш гыч ешарен каласыш: - Обезьян-влак кочкыныт!

Обезьянжым палем - сӱретыштат, телевизорыштат ужынам. Нуно тугай чулым улыт, чыла вере шуыт.

Тодылалтше кумылан уэш кудывечыш лектым. Пием пелен пызнен шинчым. Чурием мучко йогышо шинчавӱдем Шарик нулал-нулал колтыш.

Икмыняр кече гыч мыйын окса пособием нална. Мо тугай пособий, мый ом пале - ава тыге ойла. Коктын олаш каяш погынышна. Олаште кугу-кугу пазарышке пурышна. Шинчам олык гай шарлыш - мо гына тушто уке! Эн чотшо воштыр кашташте кечыше банан-влак ӧрыктарышт. Тунаре шуко! Ӧрмем дене кычкыралынак колтышым:

- Авай, авай, тыште ик обезьянат уке! Банан-влакше, ужат, кузе кечат!

Йырна улшо еҥ-шамыч рӱ-ӱж воштыл колтышт. Молан воштыльыч - мый шым умыло. Вожылмем дене аван шеҥгек шылаш тӧчышым.

Ужалыше кокай шыргыжалят, мыланем кок бананым шуялтыш:

- Держи, мальчик! - ыштале.

- Ой, тау! - маньымат, содор руалтышым.

Вот вет, кушто обезьян уке, тушто бананым нигӧ ок тӱкӧ.

М. ИЛИБАЕВА.