20 олаште юж эн начар

Россий Федерацийын Пӱртӱс ресурс да экологий министерствыже эн амыргыше атмосферан 20 олам ойырен. Ты спискыш Биробиджан, Благовещенск (Амур эҥер воктенсе), Братск, Зима, Красноярск, Кызыл, Лесосибирск, Магнитогорск, Минусинск, Новокузнецк, Норильск, Петровск-Забайкальский, Селенгинск, Улан-Удэ, Усолье-Сибирское, Чегдомын, Черемхово, Черногорск, Чита, Шелехов ола-влак логалыныт, ведомствын «Россий Федерацийыште йырым-йырысе пӱртӱсын состоянийже да тудым аралыме нерген» докладшылан эҥертен, воза «Известий» газет.

«Пытартыш кум ийыште атмосферыш шукырак амыртыше вещества логалмылан кӧра тӱрлӧ чер шукемеш. 2014-2016 ийлаште юж амыргымылан кӧра астма дене черланыше икшыве-влак коклаште 1,7, кугыеҥ коклаште 1,5 пачаш шукемын. Пурак, фтор да тудын соединенийже-влак, аммиак, толуол, формальдегид, бензапирен, углеродын оксидше, хлор да тудын соединенийже, неле металл-влак, ксилол, бензол, алифатический углеводород, азотын оксидше-влак, гидроксибензол, сероводород да моло соединений-влак айдемын тазалыкшылан кугу эҥгекым ыштат», - палемдыме докладыште.