Газетын сайтыштыже чыла уверымак огыда верешт

Шочмын паша кече тӱҥалын веле ыле, редакцийышкына газет дене пеҥгыде кылым кучышо илалше авторна йыҥгыртыш. Шушаш ийлан «Чолманлан» идалыклан возалтме акым да индексшым рашемдаш йодеш. Почта связь отделенийыш подпискым ышташ миенат, кенеташте изишак ӧрын докан. Кызытсе каталоглаште, чынжымак, «йомашат» лиеш - икмыняр индексым, тӱрлӧ акым ончыктымо. Тидын шотышто «Чолманым» эреак лудын шогышо-влаклан куштылгырак докан, вет, подписка тургым тӱҥалмек, икымше лаштыкеш могай йӧн дене газетланна сералташ лийме нерген чӱчкыдын ушештарена. Кумылда уло гын, ынде почта гоч куд тылзылан але вигак ик идалыклан подпискым ыштен кертыда. Индексышт да акышт тӱрлӧ: пел ийлан 396 теҥгеат 96 ыр (индекс - П2752), ик идалыклан - 719 теҥгеат 89 ыр (индекс - П3379).

НЕФТЕКАМСКЫШТЕ ИЛЫШЕ-ВЛАКЛАН, газет акым шулдештараш манын, шкаланышт редакцийыш толын налаш темленна ыле. Тыге пел ийлан 246, идалыклан 418 теҥгем тӱлыман. ЫНДЕ эше ВЕС ЙӦНЫМ шотыш налза. Редакцийыште гына (почта гоч огыл) «Чолманлан» пел ийлан 300, идалыклан 560 теҥге дене подпискым ыштена. Тыгай ак денак оласе «Красное знамя» газет редакцийыште «Чолманлан» подпискым налыт. Газетым тыланда лӱмын тарлыме еҥ-влак нумалаш тӱҥалыт.

Ӧрдыж кундемыште илыше-влак пел ийлан 600, идалыклан 1200 теҥгелан возалт кертыт. Тидлан оксам редакцийын счетышкыжо колтыман (нылымше страницыште ӱлнӧ ончыктымо) да адресдам редакцийыш шижтарыман. Кӱкшырак акше почто услугым шергештарен толмо: конверт да марке ак - дене кылдалтын. Электрон подписка 270 теҥгем шога.

«Ай, газетлан молан возалташ?! Интернетысе лаштыкышкыда чыла шындылыдас, тушто лудына» манше палымына-влакат улыт. Уке шол, йоҥылышрак лийыда. Тушто кӱчык уверым да чӱчкыдынак материал тӱҥалтышым гына муаш лиеш, а эн оҥайжым огыда верешт, лудде кодыда. Кеч-мом манза, тидыжат-тудыжат пайдале: газетыште тичмаш, моло вере тидын нерген возыдымо материалым муаш лиеш гын, «ВКонтакте» социальный сетьыште да газетын сайтыштыже фотолан шукырак верым ойыраш, мутланымашым, йодыштмашым тарваташ йӧнан… Икманаш, чыла йӧнжат сай, подписка тургым тарванымым шотыш налын, шкаланда келшышыжым ойырен налза! «ЧОЛМАНЛАН» ПОДПИСКЫМ ыштыде ида код!