«Юзо шонымашем шукталте»

- Лена, телепередачыш кузе логалынат?

- Чылажат «Башкортостанын идалыкын туныктышыжо-2017» конкурс гыч тӱҥале. Тушко шкемын автобиографиемым книга семын ямдыленам ыле. Тудым, тыгак Башкортостанлан 100 ий темме вашеш ямдылыме кроссвордым да оҥай серышым февральыште «Юзо пасу» передачыш колтышым. Да вучаш тӱҥальым… Июльышто мылам «ВИД» телекомпанийын тӱҥ редакторжо Т. Савлук йыҥгырта да «Те телешоуш толаш келшеда мо?» йодеш. Тыгай йӧн илышыште ик гана пуалтеш. Конешне, келшенам. Съемко марте ик арня кодмеке, ӱжмашым нальым.

- Пӧлек шотеш мом наҥгайыме нергенат вуйым пудыраташ логале, очыни…

- Пӧлек-влакым вигак ямдылаш тӱҥальым. Пелашем да изи ӱдырем дене оласе кевытыште чак-чакым кӱэшташ заказатлышна, пошкырт мӱйым, кундемын символжо семын пушкыдо мӱкш модышым да шкемын усталык пашамым - шырча ден атлас лента гыч ямдылыме кидпашам-влакым - наҥгайышна. Арина ӱдырем ончылгоч почеламутым тунем ямдылыш.

- Кузе вашлийыныт?

- Москваште мемнам «Останкино» гостиницеш вераҥдышт. Номерым ончылгоч «ВИД» телекомпаний шкеак бронироватла да тӱла. 24 августышто собеседованийым эртышна. Вес кечылан - съемко. Тиде эфирыш элнан тӱрлӧ кундемже: Крым, Черкессий Республика, Архангельск, Свердлов областьла, Тула ола гыч - индеш участник миен. Студийыште чыланам передачын директоржо

А.Б. Гольдфедер вашлие.

- Мемнам вигак тыге кумылаҥденыт: телепередаче - тиде шоу, садлан пӧлек, очко нерген шонкалыман огыл. Тӱҥ сомылна - тиде саламым ойлаш да шкем калыклан ончыкташ. Шерева почеш мый кумшо тройкыш логалынам, верже - кокымшо. Тушкыжат посна ӱжмашым пуэденыт. Съемко кок шагатат пеле жап шуйнен. Дубль деч посна - кузе войзеныт, эфирыш лукмо годымат чыла тугак. Чынже дене, чон вургыжын, моткоч тургыжланенам. Студийыш лекме деч ончыч гримеркышто макияжнам тӧрлатеныт, пӧлекнам оптен лукташ подносым, корзинкым пуэныт. А эше участник-влаклан ойырымо пӧлемыште мыланна кугу самовар йыр тамле сийым ямдыленыт, ӱстелым погеныт. Тиде телешоум ямдылыше команда кугу. Да чылан поро кумылан улыт.

- Леонид Якубович нерген могай шонымаш кодо?

- Залыш лекташ черетым посна пӧлемыште вученна. Кокымшо, кумшо турышто модшо-влакым залыш ончылгоч огыт пурто. Якубович мемнан пӧлемыш передаче тӱҥалме деч пел шагат ончыч пурыш. Кажне дене посна палыме лие, мутланыш, съемко дене кылдалтше правил нерген каласыш (Мутлан, студийыште «пычкемыш» зона-влак улыт, кушто модшо йӧршын ок кой. Тугай вер деч кораҥаш йодо.). Капитал-шоун озаже йытыра, моткоч элегантный да мемнан ончылно пеш серьезный ыле. Тудым шке шинчам дене ужаш пӱрен манын, нигунам шонен омыл.

- Мыйын тройкысо икымше участник дене жап моткоч кужун шуйныш - ойлыш, мурыш. Мый гын ту татыште шонкаленам да черет шумо жаплан мутым паленам. Икымше буквам каласымеке, умбакыже барабаным пӧрдыкташ шым тӱҥал - мутым каласышым. Ӱдыремлан фарфор курчак ден телефоным пӧлеклышт да мыйым вигак камерыш интервьюм пуаш наҥгайышт. Нимом умылен от шукто - тунаре чылажат писын эрта. Полуфиналыште изиш нелырак ыле. Туге гынат туштат пиал шыргыжале: мутым пален, финалыш - сеҥышыш - лектым. Погымо очколан Интернетан телевизорым, пелашемлан капсулан кофемашиным нальым. Супериграште модаш шым кӧнӧ - лӱдыкшӧ ыле изишак (воштылеш).

- Рӱдолам ончен кошташ жап лийын мо?

- Москваште ВДНХ-ште, океанариумышто, Йошкар площадьыште лийынна. Тудо кечылаште тушто «Спасская башня» тӱнямбал фестивальлан ямдылалтыныт. Француз мурызо Мирей Матьен выступленийжым ужын, юзо тӱняште улмыла чучын…

- Модметым куанен ончышна. Тек ончыкыжат чыла шонымашет шукталтеш!

Л. ШАВАЛИЕВА мутланен.

Сникыште: Телешоун студийыштыже.

Еш архив гыч налме фото.