У тунемме ийыште мо вуча?

Теният августышто чыла вере эртарыме конференцийлаште образований пашаште тыршыше-влак тӱҥ йодыш-влакым каҥашеныт. Республикыште, олала ден районлаште лийше педсоветлаште шке пашаштым иктешленыт, сеҥымашыштым акленыт, ситыдымашым лончыленыт. Но тӱҥ йодыш эл мучко садак икте: туныктымо пашаште ме могай корно дене каена, мом эше тӧрлыман, вашталтыман? Ала шинчымаш кугорнышто иктаж мом сайым, монден кодымым, пӧртылтышаш уло? РФ образований да наука министр О. Васильеван, мемнан республикысе туныктышо-влакын конференцийыштышт Башкортостан Республика Вуйлык Р. Хамитовын ойлымыштым колыштын, тыге каласаш лиеш: кызытсе илышын йодмыж почеш шинчымашым пуаш тыршыме дене воспитатлыме пашам йомдарен толына. Йоча-влакын школышто налме теорийым практикыште (илышыште) кучылт моштыдымыштат туныктымо системыш вашталтышым пурташ (але ожнырак кучылтмо пайдале опытым пӧртылташ) кӱлмым ончыкта.

Нефтекамскысе туныктышо-влакын совещанийыштышт БР Образований министерствын кадр паша шотышто пӧлкажым вуйлатыше Д.Я. Кутушева, элысе шинчымаш тӱнян вуйлыкшо О. Васильеван мутшылан эҥертен, тунемше-влак гыч 45 процентше лудын лекме почеш текстын содержанийжым каласкален кертдымым палемдыш. «Лудмаш шонкалымаш процессым вияҥда, садлан йоча-влакым книгалан шӱмаҥдыме, библиотека-влакым шукемдыме дене гына серлагыман огыл, тидым ышташ туныктымо методикымат вашталтыман», - Диляра Ядгаровна туныктышо-влакымат шонкалаш таратышыла ойлыш.

Пытартыш лу ий жапыште туныктышо-влакын квалификацийышт (туныктымо кӱкшытышт, ӱнарышт) начареммым каласен кодыш. Тиде вуз да кыдалаш специальный педучреждений-влакын кадрым ямдылымышт денат кылдалтын, адакшым шуко педагоглан кызытсе требований почеш йоча-влакым туныкташ лӱмын переподготовкым эрташ кӱлеш.

Шинчымаш корным виктарыше тӧра-влак, сайжым ончыктен, ситыдымашымат кораҥдаш кӱлмым туныктышо обществыште шинчаваш каҥашат гын, вашталтыш кӱлешан да лектышан лияш сӧра.

И. ГУБАЕВ.