Осал кушкылым шындымылан мутым кучаш верештеш

Восточный мак Papaver кушкыл ешыш пура. Тудо макын 100 утла видшым ушен шога. Макым куштымо шотышто теве мом ушештарыме шуэш. Кеч-могай макыште садак наркотический вещества уло. Садлан макым закон почеш сад-пакчаште йӧршын куштыман огыл. Ни кулинарий сомылышто кучылташ, ни косметика семын. А шошым кевытыште тушым налме годым садоводческий фирма-влакын темлымыштым шекланыман. Молан манаш гын южгунам макын тушыжо тӱрлӧ саска смесьыште лийын кертеш. Специалист-влакын палемдымышт почеш, тудо шукыж годым мавританский газон туш смесьыште вашлиялтеш. А эше наркотиклан шӱман-влак сад-пакчаштыда мак кушмо нерген пален налыт гын, порым вучыман огыл.

Теве республикысе олала ден районлаште наркотикым шаркалыме ваштареш кучедалме шотышто кызыт «Мак-2017» профилактика операций (кокымшо ужашыже) эртаралтеш. Наркотический вещества улман кушкылым куштымым верештме годым нуным шындыше оза-влакым мутым кучаш шогалтат. МВД-н Башкортостан Республикысе пӧлкажын пресс-службыжын увертарымыж почеш, тений полиций пашаеҥ-влак республика мучко чумыржо 83 000 квадрат метр кумдыкышто кынем ӱдыман 62 плантацийым верештыныт. Тыгай пример шагалак огыл. Мутлан, Нефтекамск олаште илыше ик пӧръеҥ, коден кайыме сад-пакчалаште кушшо ир кынем верештын, уголовный пашан тӱҥ геройышкыжо савырнен. Полиций пашаеҥ-влак тудым наркотический средствам аралымылан чареныт. Мумо кушкылым нуно республикысе МВД-н Экспертно-криминалистический рӱдерышкыже колтеныт. Тушто кушкылышто наркотик вещества улмым пеҥгыдемденыт. Тыге пӧръеҥ ваштареш 228-шо статья почеш уголовный пашам тарватыме. Эше весе. Салават олаште 26 ияш пӧръеҥын пачерыштыже фасоватлыме гашишым муыныт. Следствийын палемдымыж почеш, ондак судитлалтше гражданин наркокурьер семын шийвундым ыштен налаш шонен улмаш. Законым пудыртымым эскерыше пашаеҥ-влак тудын деч вич грамм утла гашишым поген налыныт. Тыге «Мак» операцийым эртарыме жапыште, август марте, республика МВД-н Наркотикым шаркалымым эскерыше управленийын пашаеҥже-влак 500 утла преступленийым верештыныт. А полиций пашаеҥ-влак 24 утла килограмм шаркалыме наркотикым да психотропный веществам, тыгак наркотический вещества улман ир кушкыл семын шарлыше 62 верым муыныт, увертара БР МВД-н пресс-службыжо.

Л. ГРИГОРЬЕВА.