Ожно да кызыт

Тиде ятыр ий ожно лийын.

...У Юмаш селан клубыштыжо январь мучаште отчетный погынымаш эрта. Культур полатыш калык шыҥ-шыҥ темын. Шӱлаш йӧсӧ, омсам коклан-коклан изиш почын, йӱштӧ южым пуртат.

«Мичуринский» совхозын пашаеҥже-влак, иктын-иктын трибун воктек лектын, мутым ойлат. Теве кокла ийготан пӧръеҥ лектын шогале, собранийым вӱдышӧ совхоз директор велыш вуйжым савырыш. «Фаяз Нуретдинович, те мемнан селан уремже дене кечеш икмыняр гана кудал эртеда. Уремыште пурак нӧлталтеш. Тидым огыда уж мо? Мемнан ӱдырамаш-влакым кеч изиш чаманыза. Мушмо арверым сакен кошташат йӧн уке. Кугорныш асфальтым шарыман огыл мо?» – йодо мутым налше пашаеҥ. – «Ойлымо шомакда ден пеш келшем, ӱдырамаш-влакымат чаманем, - вашешта совхоз директор. – Селаште районын эн кугу сӧсна комплексше верланен. Залыште шинчыше-влак кокла гыч шукыда тушто тырша. Сутка еда комплексыште мыняр сӧсна иге колымым те пеш сай паледа. Айста, йолташ-влак, эрласе кече гыч колышо сӧсна игыда-влакым уремысе корныш радамлен опташ тӱҥалына. Тиде пашалан мыланна шукертак пижман ыле. Ынде селан корныжо кӱ дене вакшме гай лиеш ыле». Директорын вашмутшо деч вара погынымаш лыпланыш...

Тысе калык ожно кугу комплекс улмо дене пайдаланен. Районышто кӧлан сӧсна иге кӱлын, тудым налаш эн ондак тиде селаш вашкеныт.

Икана район вуйлатышына вес район гыч толшо вуйлыкым районын чекше – Тошто Чикей воктен – вашлийын. Райрӱдыш кудалмышт годым У Юмаш ялыште урем тич сӧсна-влак игыштым вӱден коштыныт. «Мыйын вуйлатыме районыштем тынар сӧсна уке», - манын уна. «Мланде йымак порволен кайышаш гай лийым. Тунар йӧндымӧ чучо», - шарнен ойла ыле район вуйлатышына.

Кызыт У Юмаш урем дене Шаран – Уфа чапле трассе эрта. Кугорнышто пуракат уке, уремыште сӧсна-влакат огыт кой. Ынде селаште кугу сӧсна комплексын лиймыжым шукышт огытат пале дыр.

А. АСМАЕВ.