Мондалтше йӱлам пӧртылтат

Надежда Мурзагареевна Давлетова районышто кумдан палыме предприниматель улеш. Марий-влак эртарыме тӱрлӧ мероприятийлаште полыш кидшым шуяш эре ямде. Тений кӱсӧ тылзын Юмылан тагам пуымо йӱлам шукташ шкежак ойым пуо.

Акпарс села воктенсе отышко кечывал лишан марла вургемым чийыше ӱдырамаш-влак тӱрлӧ кочкышыштым намийышт, Надежда Мурзагареевна шкежат марла тувыр дене кажне мийышым саламлен вашлие.

Йӱлан радамжым тӱҥал-тыш гыч мучаш марте онаеҥ А.А. Асылбаев шот дене шуктыш. Чопай селан чолга пӧръеҥже, кандашле ийым эрталтен гынат, тиде пашаште моткоч куштылгын шогылто. Альберт Гибадуллин ден Юрий Звездин онаеҥын эн лишыл полышкалышыже ыльыч. Акпарс селан пӧръеҥже-влак Г. Танаевлан, Г. Шамигуловлан, А. Сайрановлан паша ситышашлык ыле. Чоклымо мутым колыштеке, погынышо калык Юмылан пуаш ямдылыме шылым, пучымышым да моло сийым тамлен ончыш. Ялсоветын ончычсо председательже Г. Ахметшина кумалтышын тӱҥ организаторжылан, онаеҥ ден полышкалышыже-влаклан, районысо марий мер ушемын еҥыштлан, кызытсе ялсовет вуйлатыше Г.Е. Мухаметовлан, тӱшкан толшо калыклан таум каласыш.

А. АСМАЕВ.