Все новости
Новости
18 Сӱрем 2017, 17:56

Чеверын, лагерь!

«Старт» спорт да тазаҥдыме йоча лагерьыштеикымше смена мучашке лишемын.

Ӧрдыж гыч ончалмаште, районысо «Старт» спорт да тазаҥдыме йоча лагерьыште черетан торжественный линейка моло деч нимо денат ойыртемалтын огыл. Но кажне шомакыште, кажне йочан ончалмаштыже шӱлык шижалтын - эрдене ӱдыр-рвезе-влаклан йолташышт дене кужу жаплан чеверласаш перна. Икымше смена мучашке лишемын.


Тений йоча-влаклан утларакшым лагерь кудывечыште огыл, клуб кӧргыштӧ погынаш логалын. Чаманаш веле кодеш, игече ударак шоген. Чодыра воктене модаш, олыкышто мечым шер теммешке поктылаш йӧн лийын огыл. Но пырля чумырген жапым эртарымаш йоча-влак коклаште вашкылым пеҥгыдемден. Лагерьыште йоча-влак келшен илыше ик ешыш савырненыт. Мӧҥгӧ кайымышт деч ончыч икте-весыштлан телефон номерыштым пуэныт, вет келшымаш тул коклаштышт лагерь деч ӧрдыжтат йӧрышаш огыл.

...Теве Российын да Башкортостан Республикын гимнышт йоҥгалте. Лагерьын директоржо Р. Шайбаков йоча-влаклан сугынь мутым ойла. Тудо ӱдыр-рвезе-влакын канымышт, кӱчык жапыште воспитатель-влаклан шерге да лишыл лиймыштым палемда. Тудланат йоча-влак дене чеверласаш нелырак. Образований пӧлка вуйлатыше С. Александров, образований пӧлкан специалистше А. Килинбаева поро тыланымашым каласышт. Мероприятийыш Паралимпийский модмашын чемпионжо, лагерьыште эртарыме спорт модыш-влакын спонсоржо Кирилл Михайлов толын ыле. Спорт таҥасымаште ойыртемалтше-влаклан пӧлек ден Чап грамотым кучыктыш. Икымше сменыште тений шӱдӧ наре йоча канен. Нуно лагерьыште куштымаш, модмаш, музык, спорт, декоративно-прикладной искусство кружоклаш коштыныт. А сменым петырыме кечылан оҥай да ямле концертым ямдыленыт.

Е. МАТВЕЕВА.

Мишкан район.
Читайте нас в