Эн тале лийын

28 июнь гыч 2 июль марте Казахстан Республикысе Костанай олаште инвалид-влак коклаште ӱстел теннис дене тӱнямбал турнир эртен. Таҥасымашке Казахстанын 16 областьше гыч инвалид-спортсмен-влак чумыргеныт. Российын чапшым Челябинск область да Башкортостан гыч мийыше спортсмен-влак араленыт.

Республикын сборный командыштыже мемнан районысо йоча-юношеский спорт школын инструкторжо, ӱстел теннис дене спорт мастер Эренбург Миксоноват лийын. Тудо шке тӱшкаштыже (4-ше класс) личный зачетышто икымше, мужыр командный разряд дене кокымшо верым налын. Абсолютный первенствыште (1-5-ше класс-влак) теннисист-влак коклаште эн тале лийын.

Тренер Р. Ямаев воспитанникшын выступленийже дене моткоч кугешна. Каласен кодыман, Эренбург Миксоновым чыла таҥасымашке тудо кондыштара. Роман Камаевичын мутшо почеш, Казахстаныште ӱстел теннис вияҥаш веле тӱҥалын, садлан нунылан мемнан спортсмен-влакын выступленийышт мастер-класс гай лийын.

Организатор-влак Россий гыч мийыше спортсмен-влакым порын вашлийыныт: тугок пукшеныт, посна транспортым ойыреныт. А таҥасымаш-влак спортсмен-влаклан у йолташым муаш полшеныт. Июль покшелне Челябинск областьысе Миасс олаште эртыше «Край голубых озер» Всероссийский фестивальыш Казахстанысе спортсмен-влакат толнешт.

Спорткомитетын председательже Р. Ямаев, спортсмен Э. Миксонов Казахстаныш миен толаш полшышо спонсор А. Фатхинуровлан кугу таум ойлат.

Е. МАТВЕЕВА.

Мишкан район.