Вучымо уна - «Чолман»!

Тений 24 апрельыште «Чолман» газет 25 ийым темыш. Тидым ик эн тӱҥ событийлан шотлаш лиеш, очыни. Газетын статусшым шотыш налын, каласаш лиеш - юбилейлан пӧлеклыме мероприятий-влак сай эртеныт. Официальный уна-влак газетлан, редакций пашаеҥ-влаклан тауштыме серышым, Чап грамотым кучыктеныт, марий йылме дене лекше республикысе газетлан кӱкшӧ акым пуэныт. Тиде сомыл деч внештатный автор, лудшо-влакат ӧрдыжеш кодын огытыл. Йыргешке лӱмгечым эртарыме пайремыш нуно погынен толыныт. Лудшына-влак дечат саламлыме серыш ятыр лийын. А чон почын мутланымаш, районла гыч моло каласышаш шомак «Чолманлан - 25 ий» пайрем концертыште йоҥгеныт.

Жап вашталтмылан кӧра «современный технологий-влак» мемнан пашашкат сайынак шыҥен пурат. Лудшо аудиторий дене ончычсо семын газет лаштык гоч веле огыл, Интернет полшымо денат мутланыме йӧным кумдаҥдена. Рашынрак каласаш гын, тений «Чолман» газетлан сайт деч посна «ВКонтакте», «Одноклассники» социальный сетьлаште посна лаштыклам почмо. Фоторепортажым, пайрем-влак гыч видеосюжет-влакым, газетыште савыктыдыме да марий еҥын илышыж дене кылдалтше моло материалым, «шокшо» увер-аҥарым лач тушто вераҥдена. Куандара: сайтыш, нине тӱшкалаш пурышо-влакын чотышт ешаралт толеш. Кӧ эше мемнан дене пырля огыл, ушныза.

Сай проектлан тений кеҥежым эртарыме «Кеҥежын мотор ӱдыржӧ» конкурсым шотлаш лиеш. Тушко самырык-влак куанен ушнышт. Конкурсын географийжат куандарыш. Эн сылне ӱдыр-влак лӱмеш эртарыме фотосессий сай шарнымашым кодыш. Тыгай проектым тендан полшымо дене, пагалыме лудшына-влак, умбакыжат эртараш кумылна уло. Тиде ийыште тыгак «Монча» конкурс «кокымшо шӱлышым» нале. Ӱжмӧ верлашке миен толаш йӧн лие. Тыгай сомыл у лудшо-влакым ешараш полшыш, у шонымашым тарватыш. Редакцийыш йыҥгыртен, «Мемнан декат толза, вучена» манын ӱжмым шотыш налаш гын, лудшылан конкурсым эскераш, тушко ушнаш келшен манын умылыман, очыни. Шушаш ийыште эше у конкурс-влакым тарватена. Темлымашда уло гын, шижтараш ида мондо.

Российыште да Башкортостаныште увертарыме Кино идалыкымат ӧрдыжеш ышна кодо. Марий-влакын Россий кинематографий дене кылдалтше да илышыште лийше историйыштым, шарнымашыштым уло кумылын савыктышна.

Внештатный авторна-влакат газетыш эреак возгаленыт. Кундемласе увер-аҥар, калыкнан ончылъеҥышт дене палдареныт. Чӱчкыдын возгалыше автор-влак кокла гыч С. Сабитовым (Тошто Педий, Нуриман район), А. Асмаевым (Шаран район), А. Байгашевым (Нефтекамск ола), А. Артамоновам (Братовщина, Калтаса район), Т. Дигитаевам (Мишкан села), И. Бухаровым (Памаш, Бирск район), А. Николаевам (Калегин, Калтаса район), А. Асылбаевам (Елтек, Дӧртыльӧ район), Н. Иргубаевым (Николо-Березовка, Краснокам район), Л. Япаровым (Курмызак, Бирск район), Е. Андреевам (Тошто Педий, Нуриман район), В. Давлетгареевам (Нефтекамск ола), Р. Ялаевам (Мишкан села), Р. Алпаевам (Пӧкленде, Мишкан район), З. Сыртланова-Урсаевам (Октябрьский ола), А. Исинбаевым (Нефтекамск ола), А. Юзукбаевам (Чорай, Мишкан район), Ю. Иксановым (Коян села, Краснокам район), М. Гареевам (Нерге, Мишкан район), С. Новиковым (Тымбай, Мишкан район), И. Захаровам (Монар, Мишкан район), А. Васиевам (Коян, Краснокам район), Н. Минаевам (Тымбай, Мишкан район), А. Мухаматдиновым (Шӱкшан, Бурай район), А. Ильчигуловам (Атлегач ял, Янаул район) палемдаш лиеш. Мӱндыр кундемла гычат возгалыше-влак улыт. Тиде Г. Зайниев (Йошкар-Ола), П. Емельянов (Оршанка поселко, Марий Эл), Л. Михайлова (Татарстан кундем), Е. Минилбаева (Москва ола). Тиде пашадам вес ийыштат шуеда манын ӱшанена.

Тыланда эҥертен, вуйым огына саке. Тӱрлӧ йӧным кучылтын, газет вучымо, оҥай лийже манын тыршена. Шочмо йылме дене лекше газетлан ӱшанле кодмыланда кугу таум ойлена. Кунам лудшо уло, газет ила. Тек тудо ончыкыжымат эше шуко-шуко ий тендам куандара. Шочмо йылмынам, калыкнан тӱвыражым тыге веле, пырля арален коден да вияҥден кертына. У ий дене, пагалыме марий-влак!