Рушарня марий школышто - У ий пайрем

18 декабрьыште «Калейдоскоп» усталык рӱдерын актовый залыштыже йоча-влаклан У ий представлений эртыш.

Тудым Рушарня марий школыш коштшо ӱдыр-рвезе-влаклан туныктышо ден «Жап» театр студийын самырык артистше-влак ямдыленыт да ончыктеныт. Йоча-влаклан йомак кугыжанышыш логалаш пеш оҥай лийын. Нуно шӧртньӧ колым кучаш шонышо король да принц дене пырля ойгыреныт, куаненыт. А вара, кунам Йӱштӧ Кугыза йомак герой-влакын кумылыштым шуктен, йоча-влак Йӱштӧ Кугыза да Лумӱдыр дене пырля У ий йож йыр пӧрдыныт, мурым муреныт, куштеныт, модыныт. Пайрем мучаште чыла йочалан пӧлекым кучыктеныт.