Могырда куштылго лийже!

Кок ий жапыште тӱрлӧ вере (кушко ӱжыныт) миен коштмаште ятыр мончам ончышна, посна ойыртемалтшыже да тудын озаже-влак нерген газетыште каласкалышна. Эн сайжым ойырен налаш, чынак, куштылго огыл ыле. Мончан моторлыкшым гына огыл, тазалыклан пайдале улмыжым, чоҥымаште оҥай технологийым, эстетике йӧным шыҥдарен моштымым да молымат шотыш нална. Южо еҥын мончаже гына огыл, сурт-печыже, оралтыже, сад-пакчажат сӧраллык дене ӧрыктареныт. Иктешлыме годым тӱҥ шотышто аклыше комиссийыш тӱрлӧ район гыч ушнышо внештатный авторна да мер пашаеҥ-влаклан эҥертышна. Тыгеракын, икымше верым Тӧргымдӱр ялысе мӱкшызӧ В.Н. Зайниевлан пуымо (Комиссийын еҥже-влак тудым шке семынышт «марий Кулибин» манын лӱмденыт.), кокымшо вер дене Укозаш гыч Б.А. Яникиевым, кумшо вер дене Тымбай гыч С.С. Новиковым палемдышна.

Вер-влакын радамыштым условно шеледыме, молан манаш гын кум мончажат чапле, тыгодымак кажныже икте-весе деч мо дене гынат ойыртемалтеш. Конкурсышто сеҥыше-влаклан редакций деч пӧлекым ямдыленна. Мончаште кучылташ йӧрышӧ пу арвер-влак пеш лачеш толыт, шонена. Йодмына почеш, можыч, Йӱштӧ Кугызай нунын деке У ий вашеш намиенат шукта.

Шке мончаштым ончалаш ӱжшӧ-влак шуко ыльыч, чылашт декат миен шуын ышна керт. Садлан конкурсым вес ийынат шуяш темлыше-влак улыт. Илена - ужына. Лудшын кумылжым, тудын йодмыжым шукташ нигунам тореш огынал, вет монча - йӱд клубысо пивбар огыл, тазалыклан пайдале каналтыме вер, икте-весе деке, «Кузе илет-шӱлет?» манын, унала коштмо амал. Тугеже, тыгай кылым молан умбакыжат шуяш огыл?