Туныктышо, предприниматель, поро еҥ

Акпарс кыдалаш школын капка воктекыже чӱчкыдын мотор иномарке толын чарна. Автомашина гыч йытыра кап-кылан, мотор чурийвылышан, чатка вургеман ӱдырамаш лектеш. Тудым, Н.М. Давлетовам, Акпарс ялыште гына огыл, Шаран районышто да эсогыл республикыштат палат. Надежда Мурзагареевна шукертсек Шаран селасе пекарньым вуйлата, а эше Шаран районышто, Туймаза олаште верланыше кевыт-влакын озашт улеш.

2003-шо ийыште вате-марий Надежда Мурзагареевна да Юрий Исламович Давлетовмыт шке производствыштым почыныт. Эн ондак шочмо Акпарс ялыштышт чапле кевытым чоҥеныт. Тыште сурт коклаште кӱлешан чыла сатум: кочкыш-йӱышым, атышӧрым, чийыме вургемым да молым - налаш лиеш. Ял калык йодмо почеш мешак дене ложашым, вольыклан фураж ден комбикормымат конден ужалат.

Надежда Мурзагареевна Акпарс ялеш шочын. Йоча пагытше тышанак юарлен эртен. Ӱдыр школышто тунеммыж годымак чолга лийын: мураш-кушташ йӧратен, организатор койышым ончыктен. Тыгай улмыжо, очыни, тудым Йошкар- Олашке Марий кугыжаныш пединститутысо филологий факультетыш тунемаш пураш таратен. Институт деч вара шочмо Акпарс школыш туныкташ толын, чыла шинчымашыжым, чулымлыкшым йоча-влаклан пуаш тыршен.