Чон йодмо годым

Марий ӱдырамаш кидпашалан эре уста лийын. Ожнысырак нӧлтен куымо тувырыштым але шӱртӧ пырчым шотлен тӱрлымӧ вургемыштым кызытат куанен да кӧранен ончена. Тыгай кугу пашалан мыняр жап, чытыш кӱлын, шинчаланат вий толын дыр? Но вет сӧрал ыштыш-кучышлан йывыртыме чон шижмашым нимо дене от вашталте! Садланак дыр кызытсе тукымат кидпашалан шӱман веле огыл, эше ала-мом уым шонен лукташ, ыштен ончаш мастар.

Тений кеҥежым Мишкан район Пӱнчерыште куштымаш пайремым эртарыме годым, кидпаша мастар-влакын темлыме арверыштым ончен ошкылшемла, ты кундемын шочшыжо, Кугу Соказа ялеш шочын-кушшо В. Янгуатова дене палыме лийым. Валентинан шер гыч ыштылме сӧрал, пеш чатка арверже-влак: гердан, жгут, браслет, косынке, алга, кӱ дене сӧрастарыме колье да молат - ӱдырамаш-влакланат оҥайын чучыныт: пӧрдыктыл-пӧрдыктыл онченыт, йодыштыныт, наледеныт.

Тыгай сылне арвер моторлыкым аклен моштышо ӱдырамашын чон кылжым тарватыде ок керт. Шӱртеш але лескеш кередыме тӱрлӧ чиян шер коклаште пуйто чонлан лишыл марий тӱрым, сылне пеледыш-влакым «сӱретлыме».

«Гердан калык коклаште венгр, украин-влак деч шарлен, манаш лиеш. Тачысе кечын, Интернетыште темлыме каҥаш почеш тӱрлӧ кидпашалан тунемаш лийме годым, посна калыкын ойыртемже улмо нерген гына ойлашат огеш лий. Кӧлан мо келша, тудым ыштыл онча. Мыят тӱрлаш, ургаш, крючок дене пидаш йӧратем гынат, пытартыш идалык шукыжым шер дене тӱрлӧ арверым ыштылам. Выставкылаште, ярмиҥгалаште лийме гыч шижам: пашам-влак ӱдыр-влакланат, ийготанрак ӱдырамаш-влакланат келшат. Герданым шӱеш аралтыш семын пижыктен кошташ але вургемым ешарен сӧрастараш наледат. Моло сатуэмат йодшо-влак улыт», - каласкала Валентина.

Самырык тукым Интернет дене таҥ ошкылеш. В. Янгуатованат социальный сетьыште ыштышыж дене палдарыше лаштыкше уло. Тыге мотор арверже-влак дене шочмо-кушмо велыште гына огыл, торарак кундемлаштат пайдаланат. Йодшо улмо годым шер гыч тӱрлӧ арверым заказ почешат ыштен пуа.

Лишкырак палыме лиймек рашеме: Валентина кодший Башкир кугыжаныш университетын Бирск филиалыштыже иканаште кок факультетым - историй туныктышылан да документоведлан - тунем лектын. Кызыт Мишкан тӱвыра полатыште йоча да кугурак икшыве-влак дене пашам ыштыше методистлан тырша. Константин пелашыж дене кок ӱдырым ончен куштат. «Суртышто сомыл дене шогылтмо, изи икшывым ончымо коклаште кидпашаланат пагытым ситараш лиеш мо?» манмемлан ӱшандарышын вашештыш: «Пашалан изи падырашем-влак, Элла ден Арина, кумылаҥден шогат. Вуйышто иктаж-мом ышташ шонымаш пӧрдмӧ годым пелйӱд эртымешкат шинчылтам. Моло мастар-влакын пашаштым ужын, творческий шонымаш лектынак шога. Жапыште ыштен от нал гын, ты сескемым кид гыч мучыштарышаш гай чучеш. Мыланем кидпаша - хобби гына огыл. Арверем-влак еҥ-влакымат сымыстарышт, ӧрыктарышт, куандарышт манын шонем».