Республикын чемпионжо лийыныт

18 гыч 20 ноябрь марте Агидель олаште пӧръеҥ, ӱдырамаш да спортын ветеранже-влак коклаште республикысе спорт фестиваль эртен.

Чаманаш логалеш, Мишкан район администрацийын физкультура да спорт комитетшын бюджетыштыже шийвундо ситыдымылан кӧра ӱдырамаш ден пӧръеҥ-влакын сборный командышт таҥасымашыш миен кертын огыл. Тренер советын пунчалже почеш фестивальын финалышкыже ветеран-влакын сборныйыштым колташ кутырен келшеныт.

Таҥасымаште 45 ийым эртыше ӱдырамаш да 50 ийым эртыше пӧръеҥ-влак участвоватлен кертыныт. Командыште спортышто кугу опытан профессионал-влак Кугу Соказа гыч Юрий Айгузин, Арзамат гыч Иван Самниев, Руш Байбак гыч Марианна Пасечник, Кемий гыч Ольга Акмурзина лийыныт.

Республикысе 20 ола ден район гыч команда-влак коклаште таҥасымашыште мемнан спорт ветеранна-влакын лектышышт куандарыше лийын. Юрий Айгузин кап-кылым нӧлтымаште Башкортостан Республикын чемпионжо лийын (ик минутышто 48 гана нӧлталалтын), отжиманий дене (72 гана) кокымшо результатым ончыктен, дартсыште 34 очком поген да кумшо верыш лектын. Тудын йолташыже Иван Самниев отжиманий дене (57 гана) кокымшо верым налын, шашка дене модмаште кумшо лийын. Чыла тӱрлӧ таҥасымаште универсал Марианна Пасечник дартс дене кумшо результатым ончыктен (36 очко), отжиманий дене (45 гана) кумшо верыш лектын. Ольга Акмурзинат сайын выступатлен. Тудо шашка дене модмаште да дартсыште кумшо результатым ончыктен. Общекомандный зачетышто мемнан районысо ветеран-влакын командышт Башкортостан Республикын чемпионжо лийын, Калтаса пошкудына-влак - кокымшо, Бурзян районын командыже кумшо верыш лектыныт.

Е. МАТВЕЕВА.