Калык тӱвыра илаш тӱҥалеш

Набережные Челны олаште кокымшо гана финн-угор фестиваль эртыш.

Кодший тиде олаш кугурак ийготан-влакын усталык коллективышт чумыргеныт гын, тений усталыкыштым Агрыз, Бавлинский, Менделеевский, Кукмор районла да Набережные Челны ола гыч 12 йоча фольклор коллектив ончыктыш. В. Корневын вуйлатыме «Эр ӱжара» калык ансамбльна фестивальыште марий калык модышым устан ончыктыш.

Погынышо калыкым сцена гыч культура управлений вуйлатыше Э. Ногманова, олан мэрже лӱм дене Н. Магдеева, Татарстан Республикысе удмурт-влакын национально-культурный автономийыштым вуйлатышын полышкалышыже М. Иванова, Татарстанысе «Родник» Калык-влак келшымаш пӧртын вуйлатышыже Л. Ишалина, Набережные Челнысе «Зардон» удмурт калык ансамбльын вуйлатышыже В. Билык да молат саламлышт.