+9 °С
Ясно
Каналтыме годым
12 Августа 2023, 08:01
Абрикос - кечым ушештарыше емыж
Кеҥеж тӱрлӧ емыжлан поян. Чылажат мемнан дене ок куш гынат, экзотика фруктшым вес элла гыч конден ужалат. Кызыт теве пазарыште да кевытлаште слива, нектарин, персик да моло дене пырля кече гай тӱсан фруктым - абрикосым - лыҥ ужаш лиеш. Абрикосым свежанек кочкыт, компотым ыштат, вареньыжат пешак тутло лиеш. А эше тудым коштат, консервироватлат. Тушыжым налын коштымо абрикосым «курага», туш дене пырля коштымыжым «урюк», «кайса» маныт.
Авторын фотожо.
Тиде емыжыште тӱрлӧ витамин, аминокислота шуко. Нунын кокла гыч аскорбиновый кислотам (С витамин), ретинолым (А витамин), токоферолым (Е витамин), В тӱшкаш пурышо витаминым (В1 - тиамин, В2 - рибофлавин, В5 - пантотеновая кислота, В6 - пиридоксин, В8 - инозитол, В9 - фолиевый кислота, В17 - амигдалин), никотиновый кислотам (РР витамин), биотиным (Н витамин), макроэлемент-влакым - калий, кальций, фосфор, магний, цинк, железо, сера, кремний, натрий, алюминий, марганец, медь, бор, ванадий, фтор, молибден, никель, кобальт, йод, хром, тӱрлӧ органический кислота, А провитамин - палемдаш лиеш. А эше абрикос кумылым нӧлтышӧ фруктлан шотлалтеш.
Абрикос варене
Кӱлеш: 3 кг абрикос, 3 кг сакыр. Абрикосым, мушкын, пелыгыч пӱчкедыман, тушыжым лукман. Ӱмбакыже лончо дене сакырым оптен, сокшо лекше манын, кум-ныл шагатлан але суткалан кодыман. Сакыр дене йӧрымӧ емыжым кугу эмалированный атеш изирак тулыш шолташ шындыман. Шолаш пурымеке, вич-лу минут гыч йӧртыман. Шокшынек стерилизоватлыме банкылаш темкалыман.
Новости партнеров
