Тӱшка паша курыкым савыра

Тений январь тылзыште СВО-со землякыштлан полшымо поро пашам Тошто Яш, Актыган велнат тарватеныт. Тусо вер-шӧрыштӧ илыше чолга рвезе-влак, СВО-што улшо салтак-влак деч FPV-дрон да тушманын моло осал «кӱртньӧ кайыкше» деч аралалташ пычаллан патроным, моло арверым йодмо видеосерышым налмеке, пырля каҥашен, соцлаштыкыште тидлан шийвундым погымо нерген увертареныт.

Тыге тӱшка вий дене шӱдӧ витле тӱжем теҥге утла окса погынен. Тудден патроным, машиналан шиным, чияш шокшо кемым да моло кӱлешан сатум наледеныт. Шийвундым погымо, арверым наледыме сомыл тӱҥ шотышто тидлан вуйын шогышо чолга самырык пӧръеҥ-влакын - А. Калиаскаров ден Л. Изибаевын - вачӱмбакышт возын. Тылеч посна ялче-влак СВО-ш гуманитарный полыш семын колташ шокшо вургемым, шинчалтыме киярым, коптитлыме коям погеныт. Оксам, арверым погымо тӱшка сомылыш Тошто да У Яш, Актуган, Уял, Братовщина ялла гыч веле огыл, еҥ-влак Краснохолмский, Калтаса селала, районысо тӱрлӧ ялла да моло верла гычат ушненыт, шочмо-кушмо вер-шӧрышт деч тораште, олалаште, илыше-влакат ӧрдыжеш кодын огытыл. Гуманитарный полышым Актуганеш чумыреныт. Специальный военный операций кайыме верыш тиде грузым Р. Исеметов, А. Калиаскаров, А. Ибрашев да нунын кок йолташышт машинашт дене шкеак намиен коденыт. 

…Шочмо кундем гыч тыгай полышым налмеке, салтак-влак поро кумылыштлан, нунылан вий-куатым ешарымыштлан тылысе калыклан тауштымо видеосерышым колтеныт.