Шаран вел увер-влак

«Защитники Отечества» фондын вуйлатышыже Гульнур Галинуровна Кульсарина СВО-што вуйым пыштыше салтак-влакын ача-аваштлан, ветеран да тале волонтер- влаклан медальым, таумутан серышым кучыктен. Шаран район гычат марий калыкын пагалыме, чулым еҥже-влакым суапландареныт.

Еммет ялыште илыше Владимир Мухаметсултанович Ахтареевым, Нурей сельский поселенийын чолга мер пашаеҥжым, активный гражданский позицийлан, специальный военный операцийыште улшо-влаклан да нунын ешыштлан полшен шогымылан «Отец защитника Отечества» медаль дене палемденыт. Тудын Илья эргыже СВО-што военный врач улеш.

Районысо волонтер толкынын тале участникше, мер пашаеҥ Людмила Мурзабаевна Шамыкаевалан Башкир ӱдырамаш-влакын республикысе ушемыштын эн кугу наградыжым - Рабига Кушаева лӱмеш «Женщина - мать нации» медальым - кучыктеныт.

*

Уфаште 21 мартыште «ЭКСПО» выставка комплексыште «АгроКомплекс» 35-ше тӱнямбал выставка да Агропромышленный форум шке пашаштым мучашленыт. Ныл кече эртыше мероприятийым Российын 38 регионжо гыч 22,5 тӱжем еҥ ужаш миен. Тусо ярмиҥгаште 53 фермер да ял озанлык кооператив шке сатуштым ужаленыт. 

Форумым торжественно петырыме годым 6 тӱрлӧ конкурсышто да посна номинаций-влакыште сеҥыше-влакым саламленыт. Конкурсыш пуымо 322 йодмаш гыч 109 сеҥышым ойыреныт. Сеҥыше ден призер-влаклан наградым Башкортостанын ял озанлык министржын алмаштышыже Фарит Валитов, Ял озанлык консультаций рӱдер директор Ирик Сакаев, Башкир выставка компанийын генеральный директоржо Альбина Кильдигулова кучыктеныт. 

Тиде гана Шаран села гыч марий предприниматель Надежда Мурзагареевна Давлетовам, «Лучший фермерский продукт-2025» конкурсышто «За сохранение традиций» специальный номинацийыште ушкал шыл гыч ыштыме очпочмакшым аклен, диплом да кубок дене палемденыт.