Чон йодмо почеш тырша

Р.А. Султангареева Еммет школышто 8 классым тунем лекме деч вара Кумертау оласе педучилищыште физкультур пӧлкаште шинчымашым поген.1983 ийыште самырык специалистым Юмашево школыш физкультурым туныкташ колтеныт. Кок ий пашам ыштымек, Марий кугыжаныш пединститутыш очно тунемаш пурен да, 1989 ийыште тӱҥалтыш класс туныктышо специальностян дипломым налын, шочмо кундемышкыже пӧртылын. 

Распределений почеш ӱдырым Куртетал тӱҥалтыш школыш пашаш колтеныт. Кок ий гыч Роза Чопай ял марий рвезылан, Игорь Султангареевлан, марлан лектын. Самырык еш Октябрьский олаш илаш куснен.

Роза Альмекеевна таче мартеат 8-ше школышто тырша, «кокымшо суртышкыжо» кажне кечын уло кумылын вашка. Паша стажше чылаже 41 ийыш чумырген. 33 ий йоча-влакым лудаш-возаш туныкта да тӱрлӧ могырым шуара.

«Кидыште парня ден парнят тӧр огыл. Йоча-влакат тыгаяк улыт - кажныжын шке ойыртемже. Иктын вуйушыжо пӱсӧ, весе кушташ мастар, кумшо писын куржталеш… Сандене школышто тунемше ончыкылык илышлан ямдылалтшаш веле огыл, илышыште шкенжын вержым муын моштышаш, санденак кажне йочан моштымашыжым вияҥдаш тыршыман», - ойла Роза Альмекеевна.

Йоча-влак дене пырля шуко поро, сай паша ышталтеш: экскурсий, поход, фестиваль, тӱрлӧ акций-влак - ойлен пытарашат огеш лий. Шымлыме, краеведений дене кылдалтше сомылым шуко шуктат. «Кызытсе жапыште проект пашалан моткоч кугу тӱткылык ойыралтеш, сандене ме тидлан йочам кӱлынак туныктышаш улына», - ойла умбакыже Роза Альмекеевна. Тунемшыже-влак оласе гына огыл, республикысе конкурслаште, научно-практический конференцийлаште вийыштым тергат да сеҥышыш лектыт. Кажне ийын математика да руш йылме дене республикысе олимпиадылаште призер радамыште улыт.

Туныктымо паша деч посна Роза Альмекеевна эше шуко мер пашам намия. Октябрьский олаште илыше марий-влакын «Эрвел марий» автономийыштым вуйлата. Чолга ӱдырамаш мер пашаштат эре ончылно улеш. Пырля погынен, марий пайрем-влакым эртарат, шкежат мураш-кушташ пеш мастар. Ончыч Октябрьский олаш марий концерт дене ик артистат миен огыл гын, кызыт марий концертыш калыкат рӱж погына.

Тудын вуйлатыме мер организацийже «Радуга культур» проект дене ӱмаште конкурсышто грантым сеҥен налын. Пашам сайын ыштымыжлан Российысе калык-влакын ассамблейышт таумутан серыш, Марий Мер каҥаш Чап грамот дене суапландареныт. 

«Пашадам тыге аклымаш чонышто могай шижмашым шочыкта? Мо тыланда тиде награде?» йодышлан Роза Альмекеевна тыге вашештыш: «Пашам наградылан от ыште, а чон йодмо почеш… Эн ончыч тиде - кугу ответственность. Мый денем тунем лекше чыла ӱдыр-рвезылан, нунын ача-аваштлан тауштен ойлем, вет туныктышын паша лектышыже - тунемшын чын илыш корныш шогалмыже, кӱлешан шинчымашым налмыже».