Салтак порысшым шуктен

Школ деч вара Октябрьский оласе шуко профилян профессионал колледжыште электромонтерлан тунем лектын да вигак Россий армий радамыш служитлаш каен. 2023 ий 16 май гыч 2024 ий апрель марте Владивостокышто танковый войскаште срочный службым эртен. Специальный военный операций кайыме годым тудат ӧрдыжеш кодын кертын огыл да служба деч вара вигак контрактым подписатлен. Шукерте огыл, 19 сентябрьыште, военный задачым шуктымо годым самырык рвезын ӱмыржӧ кӱрылтын.

Младший сержант Р.А. Далжановым пытартыш корныш ужаташ Акпарс школын туныктышыжо да тунемшыже, военнослужащий,  боевой  действий ветеран, райрӱдыштӧ илыше-влак погыненыт ыле. Чеверласыме мутым ойлышо-влак тудын шке салтак порысшым шуктымыжым, поро кумылан, пашаче, весела рвезе лиймыжым палемдышт, аважлан да куд шольо-шӱжаржылан, лишыл еҥже-влаклан ойган чаманымашым каласышт. Рустамым,  пытартыш  кумылжым  шуктен,  Татар  Улканово ялысе шӱгарлаш тоеныт.  РФ Президентын Указше дене Р.А. Далжановым Мужество орден дене наградитленыт.