Нефтекамск олан кечыже

Тиде кечын Сеҥымаш скверыште Шочмо элым аралыше сарзе-влаклан тауштен вуйым саваш, тыгак кредалме пасуэш ӱмыр лугыч лийше-влакым шарныме лӱмеш Курымашлык тул, памятник воктеке пеледышым пыштышт, «Za мир!», «Za победу!» акций семын олан уремлаж дене тӱшкан велосипед дене кудал эртышт. Специальный военный операцийлан полшымо суапле сомылыш кажне еҥ ушнен кертын - тидлан тӱвыра рӱдер ончылно патриотизм шӱлышан «Za наших» тӱрлӧ площадке-влак пашам ыштышт. Тыште маскировко сетьым пидыныт, салтаклан серышым возеныт, СВО-н участникше-влаклан шийвундым, выньыкым погеныт, туштак кӱктымӧ салтак пучымышым тамлен ончаш, «Жены Героев» Всероссийский фотопроектын выставкыштыже пелашыштым СВО-ш ужатыше ӱдырамаш-влакын илыш историйышт дене палыме лияш йӧн лийын. Йоча-влаклан Тазалык йолгорнышто тӱрлӧ интерактивный площадка, оҥай мастер-класс-влак пашам ыштеныт, чия фестиваль эртен. Тиде кечын олаште тыгак у объектым - «Амфибия» спорт комплексым - торжественно почыныт. Паркыште кечывалым верысе артист ден тӱрлӧ усталык коллективын военнослужащий-влаклан полшымо благотворительный концертышт эртен, тӱвыра рӱдер ончылно «Павильон» рок-группа мурен, кастене калыкым кугу сценыште Башкортостан ден Татарстан республикылан сулло артистышт Айдар Галимов куандарен.