Салтак-влаклан гуманитарный полыш

Ярмия, Маядык, Искуш ялла гыч СВО-што служитлыше салтакна-влак гуманитарный полышым йодыныт. Тӱҥжӧ - нунылан, боевой задачым шуктымек, тудо вер гыч йыле гына каяш автомашина кӱлеш. 

Тидлан ялсовет депутат Роман Эрикович Каликаев вуйлатыме дене инициативный тӱшкам чумыреныт, тушко Алиса Игнатьевна Каликаевам, Алёна Альбертовна Тимиряевам пуртеныт. Ярмия-влак, те патыр улыда! Шке йырда шуко еҥым чумырен, тӱҥалме пашадам мучашке шуктен кертда. Кӱшычын каласыме деч посна шке ӱмбакыда кугу пашам налында - гуманитарный полышым погенда.

Александра Ивановна Мусина (Газина) (Нефтекамск оласе 3-шо школын туныктышыжо) окса погымо шотышто «Танып» КФХ вуйлатыше Ильшат Анасович Хуснутдинов дене мутланен. Тудо ты ой дене Дӧртыльӧ администраций пашаеҥ, Миништы, Баргизбаш селалаште илыше еҥ-влакым палдарен. Нуно полшаш келшеныт. Тыге тӱшкан ситышашлык оксам погеныт, автомашинам налыныт, машиналан документ-влакым ыштеныт. Машина дене пырля наҥгаяш блиндаж сортам ыштылыныт, калык деч моло кӱлеш арверым погеныт. Маядык кыдалаш школын Ярмия филиалжым вуйлатыше Николай Вениаминович Алексеев гуманитарный полышым саклаш школышто посна пӧлемым пуэн.

Алена Альбертовна, Роман Эрикович, Алиса Игнатьевна, Ильшат Анасович, те чын волонтер улыда, поро пашам ыштыме шонымаш денак иледа да шӱледа. Ош Кугу Юмо тендам саклен кондыштарыже, илыш корныштыда рыскалан, пиалан лийза.

Тиде пашам ыштымылан СВО-со салтак тыге вашештен: «Чылаландат пеш кугу тау мемнам шарнымыланда, тыге уло кумылын полшымыланда. Ме таза-эсен гына улына, обязательно мӧҥгӧ сеҥен пӧртылына. Мемнан калыкым сеҥаш огеш лий! Юмо пуйырен гын, чылан таза-эсен пӧртылына. Ончыкыжат пырля, икте-весылан полшен илаш пуйырыжо».

27 январьыште Ярмияште да Ангасякыште митинг лие. Ярмия-влак «Нивам» чумырген налыныт гын, Маядык да Ангасяк селаласе калык - УАЗ-Патриотым, Ангасяк да Чарлакыште илыше-влак СВО-што кучедалше землякна-влаклан гуманитарный полыш дене пырля УАЗ-Хантерым кужу корныш ужатышт. Ик автомашинажым СВО гыч отпускыш толшо салтак виктараш тӱҥалеш, а кокытшым шкенан водительна-влак намиен кодат. Корнышт пиалан лийже!