Мероприятий школысо тунемше-влакын Российын гимнжым мурымо дене тӱҥале. Вара нуно армий, Шочмо Эл, ава нерген мурым йоҥгалтарышт. Виктор Николаев, гармонь дене шоктен, «Два орла» мурым муралтыш. «Чодыра пеледыш» ансамбльын участникше-влак «Ида мондал», вара ялысе туныктышо-влак дене пырля «Шочмо-кушмо верыште» муро-влак дене куандарышт. Тугак Бакале селасе тӱвыра пӧрт гыч толшо артист-влакын мурышт, курай дене шоктымышт йоҥгыш. Мобилизоватлалтше эрге-влаклан, тора гыч вийым пуышыла, Токберде школ директор Л.А. Концепарова, мый, ялысе клуб вуйлатыше З.Б. Акбатырова, ялсовет ветеран-влакын председательышт Г.Д. Ахтареева, Афган сарын ветеранже Р.М. Ахметшин, контракт дене служитлен, Украинысе военный операций гыч пӧртылшӧ эргын аваже Э.Д. Акбатырова да Бакалы сельсоветым вуйлатыше В.Р. Семенов шуко поро мутым ойлышт, пуламыр жап писынрак эртыже да мобилизацийыш логалше салтак-влак мӧҥгышкышт таза-эсен пӧртылышт манын тыланышт.