Йӧратыме кочаем

Кочаем, Павел Сайниевич Шамыкаев, Караидель районысо Ӱткӱстӧ ялеш шочын. Тудо школышто пашам ыштен, кызыт сулен налме канышыште улеш. Тудын яра жапше уке гаяк - эре мом-гынат сӱретла. А мый кӧранен ончем.

Кочам художник улеш. Тудо 1982-шо ийыште Уфасе институтышто художник-живописецлан тунем лектын. Караидель школышто сӱретлымаш урокым намиен, вара Ӱткӱстӧ школыш куснен. Павел Сайниевич школышто коридорым да кабинет-влакым сӧрастарен. Школыш толын пурет, а коридорышто «мотор ӱдыр-влак» вашлийыт. Нуно пеледыш ате-влакым сӧралын кучен шогат. Пурла могыр пырдыжыште вӱд воктене кум мотор ӱдырым сӱретлыме. А руш йылме кабинетысе пырдыжыште сӱретлыме кум ӱдыр гыч иктыже тӱрла, весыже пеледыш аршашым кучен, кумшыжо куэ воктене шонкален шинча. Кочамын пашажым моло пӧлемлаштат ужаш лиеш.

Павел Сайниевич выставкылам ямдылашат жапым муын. Икымшыжым Караидельыште эртарен. 2004-ше ийыште пашаже-влакым Уфасе «Урал» галерейыште да Бирск олан тоштерыштыже куанен онченыт. Выставкыже-влакым Марий Элыште, Санкт-Петербургышто да Агидельыштат ужаш лийын.

Мыят сӱретлаш йӧратем, но кочам гаяк огыл. Мыланем тудын «Ӱдырем», «Пеледыш-влак», «Кеҥеж кас», «Шудо погымаште», «Пайрем», «Ялысе пӱртӱс», «Еш», «Кӱвар» картиныже-влак келшат. Павел кочам пӱртӱс лоҥгаште ила - суртшо чодыра воктене верланен. Кеҥежым эр гыч кас марте кайык мурым колыштеш. А садыштыже могай гына пеледыш ок куш! Садланак сӱретлаштыже пӱртӱс да ялысе илыш кугу верым налыт.

Кочам деке эре уна-влак толыт, шкенжымат тӱрлӧ выставкылаш ӱжыт. Йоча-влакат огыт мондо - мӧҥгыжӧ мият, пашаже-влакым чон шулен ончат. Кочам Военно-Морской флотышто служитлен, санденак, очыни, сӱретыштыже канде ден ужар тӱс ятыр улыт. Кужу жап ончен шогаш гын, чон кана.

Кувавам, Наталья Яковлевна Шамыкаева, сулен налме канышыш лекмешкыже, школышто руш йылмым туныктен. Тудо кочамын эн ӱшанле полышкалышыже улеш. Ковам ден кочам кум йочам ончен куштеныт.

Кочам пошкудыжо-влак дене келшен ила. Нуно ялысе чыла пашам пырля шуктат, икте-весыштлан полшен илат.