Йочасадыш коштшо икшыве-влаклан ава гай улеш

Алевтина Михайлова (Калиева) 1964 ий 19 январьыште Янаул район Рабак ялеш шочын. Ялысе тÿҥалтыш школышто тунемын, вара Янаулысо школ-интернатыште кыдалаш шинчымашым налын. 1979 ийыште Благовещенск педагогика училищын студентше лиеш. Тыршен тунемше, яндар йÿкан, мураш йӧратыше ÿдыр педучилищын илышыштыже солист семын ушеш кодын. Эре хорышто мурен. «Ешыштына вич икшыве кушкынна, мый кумшо улам. Стипендийым налшашлан верч чот тыршен тунемынам. Ава-ача деч эре полышым йодаш огыл, нунылан куштылгырак лийже, шоненам. Мÿндырлан кӧра ялыш шуэнракын кошташ пернен, шукыжым книга ÿмбалне шинченам», - каласкала Алевтина Валиевна. «Тÿҥалтыш класслаште туныктышо» специальностьым налын, сай шинчымаш дене 1983 ийыште педучилищым тунем лектын. Янаул районышто дипломан специалистлан У Шуадынмучаш тÿҥалтыш школым вуйлаташ ÿшаненыт. Но ик тылзе жапыште, историйым туныктышо укелан кӧра, тудым Тумна ялысе кыдалаш школыш куснаш йодыныт. Тыге тиде школышто 1990 ий марте историй предметым туныктен. Тидын годымак Марий кугыжаныш университетысе историй да филологий факультетыш заочно тунемаш пурен. 

Тумна ял рвезе, «Дружба» колхозын водительже Владислав Петрович Михайлов дене 1985 ийыште ешым чумыреныт. «Университетым тунем пытараш ыш пуйыро, 1986 ийыште Наташа ÿдырем, 1988 ийыште Саша эргым шочмеке, тунеммемым кудалташ перныш. Изи икшыве-влакым коден каяш еҥ лийын огыл. Илыш пÿрымаш корнынам вес семын савырале. Перестройка жапыште колхоз-влак шаланаш тÿҥалмеке, Свердловск областьыште верланыше Первоуральск олаш илаш куснышна. Пелашем тудо жап гыч тачысе кече мартеат «Первоуральск» плодово-овощной совхозышто водительлан тырша. Тудым шуко тауштымо серыш да грамота дене палемденыт. Мый 1990 ий тӱҥалтыште йочасадыш воспитательлан пашаш пуренам, пелашем семынак, ойырен налме ик паша верыштемак таче мартеат тыршем», - мутшым шуя А.В. Михайлова.

Икшыве-влак ава-ачам куандарат. Наташа ешыж дене Татарстан Республикысе Нижнекамск олаште ила. Кок высший образованийым налын - Екатеринбург олаште Фондовый рынокын Уральский институтшым, Набережный Челна олаште строительный институтым тунем лектын. «Татарстан Нефть» компанийын управленийыштыже ведущий инженер улеш. Саша ешыж дене Первоуральск олаште ила, индивидуальный предприниматель пашам шукта. Кова ден кочам Роман ден Валерия уныка-влак куандарат. 

А.В. Михайлова руш да моло калык коклаште ила, пашам ышта гынат, марий улмыж деч нимыняр ок вожыл. Йочасадыште тÿрлӧ мероприятийым эртарыме годым, марла тувырым чиен, марий мурымат йоҥгалтара, рушла да татарлат мураш йӧрата. Тудым олаште эртарыме тÿрлӧ фестивальыште, «Грани таланта» конкурсышто, «Народный вокал» номинацийыште ик гана веле огыл диплом дене палемденыт. Педучилищын преподавательже Н.И. Бушкован марий йылмым йӧраташ да сайын палаш кÿлмӧ нерген шыҥдарен ойлымыжо, туныктымыжо ушеш келге кышам коденыт. 

Алевтина марий йылмым тӱҥалтыш классыште веле тунемын. Янаул школ-интернатым тунем пытарыме свидетельствыште «Родной язык и родная литература не изучались» манын возымо. Но тунемаш пурен педучилищын марий отделенийышкыже. Мыняр тыршымаш кӱлын… Надежда Ивановнан моло студент ончылно моктен ойлымыжо ушеш сай кодын. Тыршен тунеммашын лектышыжат сай лийын: марий йылме денат, литератур да методика-влак денат дипломышто «5» ден «4» оценка-влак веле шогеныт. 

Пашам пырля ыштыме коллегыже-влак А.В. Михайлова нерген поро деч поро мутым гына ойлат: «Тудо творческий пашаеҥ, кугу энтузиаст улеш. Традиционный метод дене пырля тÿрлӧ современный технологийым кучылтеш. Чулым, шуко палаш тыршыше, поро кумылан, пашам йӧратыше йоча-влакым ончен куштымылан кугу тÿткышым ойыра. Воспитанникше-влак творческий, интеллектуальный конкурслаште вийыштым тергат, шуко грамот да диплом дене палемдалтыныт. Алевтина Валиевна шкежат дошкольный учрежденийын пашаштыже у йӧным кучылтеш, фестиваль, марафон да конкурслаште вийжым терга». Ава-ача-влакат икшывыштын Алевтина Валиевнан группыш логалмылан, тудо сай воспитатель улмыжлан тауштен илат. Кумло вич ий утла жапыште ятыр икшывылан авам алмаштен, школлан ямдылен, кумда илыш-корныш ужатен. Кызыт нуно элнан тÿрлӧ луклаштыже илат да йӧратыме воспитательыштлан саламым колтат.