Весела Сабантуйым пайремлышна

Сылне Сабантуйым ме йочасадысе изи ньога-влаклан ий еда эртарена. Пайрем деч ончыч татар ӱдыр ден рвезе, чыла группыш унала пурен, Сабантуйлан шовычым, муным, кампетым поген коштыт. Эн тӱҥжӧ, вашлиймаште ме изи икшыве-влакым тӱрлӧ - башкир, татар, марий, руш - калык модыш-влакым палаш кумылаҥдена. Тиде гана йоча-влаклан мешакым чиен, муным пыштыме совлам умшаш пижыктен, вӱдвара да ведра-влакым сакен таҥасымаш, тыгак «Юрта», «Оръеҥым поктен шу да шупшал», «Вӱдым писын нумалше-влак», «Кӱпчыкым кучен кучедалмаш», «Армрестлинг», «Шӧртньӧ капка», «Пареҥгым шынде» модмаш-влак поснак келшышт. Пайрем мучаште чылан рӱж кандырам шупшмаште ӱчашышт. Пӧлек деч посна могай Сабантуй? Весела пайремыште нигӧ пӧлек деч посна ыш код - чыла икшывылан тамле сийым да призым кучыктышна, а поснак ойыртемалтше, чолгалыкым ончыктышо ӱдыр-рвезе-влакым Чап грамот, пӧлек дене палемдышна.