Корнысо правилым палыман

Но… ӧрат веле, шуко еҥже таче мартеат корнышто коштмо правилым огеш шукто, кеч ме, йочасадыште тыршыше воспитатель-влак, йоча-влаклан кажне кечын корнысо туткар деч кузе аралалташ лийме нерген ойлена. ПДД дене занятийым, мутланымашым, тӱрлӧ викториным да модышым эртарена, ача-ава-влаклан каҥашым пуэна, памяткым ямдылена.

4 декабрьыште оласе 44-ше йочасадыште 9-ше подготовительный группыш коштшо-влак ача-аваштлан кызытсе илышлан келыштарыме «Йошкар Упш» театрализованный представленийым модын ончыктышт. Илышысе историй да мурымаш-куштымаш гоч корнышто коштмо правиллам палымыштым почын пуышт. А ача-ава-влак икшыве-влаклан автомашинаште шкем кузе кучаш кӱлмӧ, лӱдыкшыдымылык ӱштӧ дене пайдаланыме нерген каласкалышт. Кугыеҥ-влаклан эреак шарныман, йоча-влак чылалан нунын деч тунемыт, уремыште кузе коштмыштым эскерат да нунын семынак ыштылаш тыршат, сайжымат, удажымат койышышкышт вашке шыҥдарат!