+20 °С
Облачно
Ял озанлык
17 Июля 2024, 07:43
Чишма районышто Пасун кечыже эртен
Уржа-сорла тургым вашеш Башкортостанын районлаштыже «Пасун кечыже» семинар-влак тӱҥалыныт. 10 июльышто ял озанлык пашаеҥ-влак Шаран районышто биопрепарат ден биоудобрений полшымо дене кушкылым ончен куштымо технологий-влакым шымленыт, кодшо кугарнян Чишма районышто «семеноводство» темым лончыленыт.
Опытный участкыште. БР Правительствын сайтше гыч налме фото.
Тусо профильный НИИ-н селекций рӱдержын пашаеҥже-влак уна-влакым пырчан, отызан, технический культура-влакын ойыртемышт дене палдареныт, опытный участкылаште ӱдымӧ кушкылым ончыктеныт. «Таче селекцийлан, ял озанлык культура-влакын нӧшмыштым ямдылыме йодышлан лӱмлымӧ семинар-влаклан тӱҥалтышым ыштена. Моло тыгай семинар-влак Давлекан да Абзелил районлаште эртат. У сорт-влак дене палыме лийына, «О семеноводстве» у законын, «Семеноводство» федерал информационный системын ойыртемыштым умылтарена», - каласен БР ял озанлык министрын алмаштышыже Ирик Сураков.
Семинарыш чумыргышо ял озанлык пашаеҥ-влак опытный участкылаш экскурсийыш миеныт. Тушто тений чӱчкыдын вашталт шогышо игечыште «Башкирская 12», «Евразия» кокияш шыдаҥын, «Чулпан» уржан, «Башкирская 3» тритикален, «Башкирская 28» икияш шыдаҥын да Российысе, Башкирийысе селекционер-влакын лукмо моло сортын кузе кушмыштым ончалаш йӧн лийын. Опытный участкылаште уна-влак тыгак пырчан, пырчан-отызан культура-влакын турецкий сортыштым аклен кертыныт.
Семинарын кокымшо ужашыже Вольыкын тазалыкшым аралыме федерал рӱдерын башкир филиалжын испытательный лабораторийыштыже эртен.
