Уфаште Тӱнямбал агропромышленный форум эртен

Тушко Российын, Китайын, Кыргызстанын, Кечывалвел Корейын да Беларусь Республикын 37 регионжо гыч 340 утла компаний ушнен. «АгроКомплексын» экспозицийже 17,6 тӱжем квадрат метр кумдыкым айлен. Уремысе площадкыште кызытсе трактор, комбайн-влакым, тӱрлӧ оборудованийым - чылаже 180 наре ял озанлык техникым ужаш лийын. «Агропродукты» ярмиҥгаште 80 наре ял озанлык производитель, фермер кочкыш-йӱыш сатуж дене палдарен. Форумым эртарыме жапыште республикыште у производство-влакым почыныт: Уфимский районышто Беларусь Республикысе Мозырский машиностроительный завод дене пырля ыштыме «Фермер РБ-2103» гусеничный трактор-влакым чумырымо производство, Стерлитамак районышто «Чулпан-100» самоходный косилка-влакым погымо цех пашам ышташ тӱҥалыныт. 

Форумышто ял озанлык пашаеҥ, министерство ден АПК предприятий вуйлатыше-влак икте-весыштын паша опытышт дене палыме лийыныт, ял озанлыкысе пӱсӧ йодышлам лончыленыт, селан ончыкылыкшо дене кылдалтше,  агропромышленный комплексыш цифровизацийым да автоматизацийым шыҥдарыме йодышлам каҥашеныт, агросекторым вияҥдыме корно-влакым палемденыт. 

Тиде кечылаште Уфаште тыгак ял озанлыкыште ончымо вольыкын Генетика да селекций рӱдержым почмо нерген, БР Ял озанлык министерство ден Российысе пекарь-влакын ушемышт коклаште кундемыште кӱэштме сомыллан сай йӧным ыштыме нерген соглашений-влакым пеҥгыдемденыт, «Башкортостан Республикысе агропромышленный комплексын эн сай кадровикше» республикысе конкурсын сеҥышыже ден призержо-влакым палемденыт.

Башкортостан Вуйлык Радий Хабиров да Россий ял озанлык министрын алмаштышыже Андрей Разин Юл кундемысе федерал округын регионлаштыже агропромышленный комплексым вияҥдыме да тенийсе шошо агалан ямдылалтме шотышто погынымашым эртареныт. Тушто Радий Хабиров ял озанлык пашам у кӱкшытыш нӧлталме тӱҥ йыжыҥ-влакым палемден, отрасльын технологический вияҥмашыжлан, кочкыш-йӱыш да перерабатыватлыше промышленностьым уэмдымылан, экспорт пашам вияҥдымылан кугу тӱткышым ойырен, увертара БР Ял озанлык министерство.