Ял озанлык микроперепись тӱҥалеш

Перепись годым ял озанлык кушкылым ӱдымӧ пасу, емыжан кушкылым шындыме мланде могай кумдыкым айлыме, мыняр вуй вольык улмо нерген, организаций, кресаньык (фермер) озанлык да индивидуальный предприниматель-влакым озанлык пашам шуктымо йӧн нергенат йодыштыт.  

Тыгодым ял озанлык организаций, кресаньык (фермер) озанлык да индивидуальный предприниматель-влак Росстатын web-погымо системыж гоч электрон лаштыкысе йодыш-влаклан вашмутым шке возат, а подсобный озанлыклаште да граждан-влакын коммерческий огыл ушемлаштышт респондент-влакым переписчик-влак йодыштыт. 

Ял озанлык микроперепись годым шотлымо сомылым шукташ Башкортостаныште 1800 еҥым жаплан пашаш налыт, увертара Башкортостанстатын пресс-службыжо. Нине еҥ-влакым мультимедийный программа почеш лӱмын туныктеныт. Нуно у технологий-влакым кумдан кучылтыт. Планшет компьютер дене пайдаланымаш данный-влакым вашкерак чумырен шукташ да иктешлаш йӧным пуа. Микропереписьым тӱҥ шотышто 2021-ше ий мучаште, а тичмашынже 2022-шо ий мучаште иктешлен шуктышаш улыт.