Налшылан - сату, ужалышылан - парыш

Игече молгунамсе деч йӱштырак ыле гынат, калык экологий шотышто ару сатум налаш садак погынен ыле. Пазарыште чылажымат муаш лийын - вольык, кайыквусо шылым, свежа колым, мӱйым, шӧр гыч ыштыме кочкыш-йӱыш сатум да молат. Эсогыл «Поро кидыш пуэм» манын возымо табличкым пижыктыман ик тылзаш пырысигымат темленыт. Ола калык утларакшым шылым, пареҥгым ужалаш кондышо машина, мӱй банке-влакым вераҥдыме ӱстел-влак воктене тошкештын. Шорык шылын акше, мутлан, шулдо огыл гынат (350 теҥге дене ужаленыт), машина багажник-влак садак пустаҥыныт. Индолудым, лудым 1200-1500 теҥгелан налаш лийын. Янаул район гыч толшо сатучо нуным тыште кажне ийын ужалем манын ӱшандарыш. Шке озанлыкыште ончен куштымо сатум темлаш марий-влак Калтаса, Краснокам районла гыч веле огыл, Караидель район гычат толаш айманен огытыл. Красный Урюш ял гыч мӱкшызӧ

О. Илинбаев тиде рушарнян Нефтекамск ола калыклан мӱкш сатум налаш темлен. Олег Николаевичын мутшо гыч, Нефтекамск ярмиҥгаште тудын шкенжын налшыже-влак улыт. А шкеже мӱкшым тӱҥ пашаже кокла гыч веле онча. Туге гынат озанлыкыштыже 100 утла вуй мӱкш шотлалтеш. Караидель мӱкшызын ӱстелыштыже писте, пеледыш мӱйым, прополисым веле огыл, мӱй пӱрымат тамлен ончаш лийын.