Чап тылат, мланде пашаеҥ!

31 октябрьыште Уфа оласе Конгресс-холлышто республикысе ял озанлык пашаеҥ-влакым саламленыт. Башкортостан Республикын эн сай механизаторжо-влаклан лу «Шевроле Нива» автомобильым пӧлекленыт. Эн сай комбайнер семын Илиш район гыч Г. Гайнетдиновын кресаньык-фермер озанлыкшын механизаторжо Т. Баймиевым, Чекмагуш район «Октябрь» СПК-н механизаторжо Ф. Хазиевым, Стерлитамак район «Рощинский» совхозын механизаторжо В. Дрозябком, Мелеуз район «Ашкадарский» СПК-н механизаторжо С. Локтионовым, «Центральная» МТС-ын Дӧртыльӧ оласе филиалжын механизаторжо А. Хасбурановым, Башкир аграрный университетын студентше А. Салямовым, самоходный косилкын эн сай операторжо семын Ишимбай район КФХ-н вуйлатышыже Е. Лейтерым, эн сай водитель семын «Центральная» МТС-ын Туймаза филиалжын водительже С. Галиуллиным, йошкарушменым погышо комбайнын эн сай операторжо семын «Башкир-Агроинвест» ООО-н Благоварысе пӧлкажын механизаторжо Д. Яловойым палемдыме, кылмаш куралмаште эн сай механизаторлан Калтаса район гыч Владислав Бикмурзинын кресаньык-фермер озанлыкшын механизаторжо Д. Васильевым шотлымо. Сай паша лектышым ончыктымыштлан нунылан Башкортостан Республика Вуйлыкын пашажым шуктышо Радий Хабиров автомобиль сравочым кучыктен. Тыгак ял озанлык сатум лукмо сомылышто сай кӱкшытыш шумылан Абзелил, Стерлитамак, Балтач, Киги да Чекмагуш район вуйлатыше-влакым БР Правительствын Чап грамотыж дене палемдыме. Республика Вуйлыкын пашажым шуктышын мутшо гыч, тений кундемыште 3,3 миллион тонн утла шурным погымо, агропромышленный комплекс сатун кугытшо 120 миллиард теҥгеш шуын.

«Селалаште умбакыжат корным, школым, спорткомплексым да ФАП-ым чоҥаш, нунылан кадрым ямдылаш, икманаш, селам илаш да пашам ышташлан йӧнаным ышташ тӱҥалына», - каласен Радий Хабиров.

Тиде кечынак БР Ял озанлык министерствын Колонный залыштыже БР Правительствын Премьер-министрже Р. Марданов агропромышленный комплексыште да пищевой промышленностьышто тыршыше ончыл пашаеҥ - агроном, механизатор, вольыкым ончышо-влакым - кугыжаныш награде дене палемден. Кӱкшӧ наградым налше-влак радамыште марий механизатор-влакынат лӱмышт уло. Мишкан район Ленин лӱмеш колхозын механизаторжо Г.А. Аликовым «За самоотверженный труд в Республике Башкортостан» отличий знак дене, Калтаса район «Бикмурзин Владислав Петрович» кресаньык-фермер озанлыкын механизаторжо Валерий Петрович Бикмурзиным Башкортостан Республикын Чап грамотыж дене палемдыме.

Л. ШАВАЛИЕВА.

Снимкыште: Д. Васильев.