+13 °С
Облачно
Ял илыш
3 Сентября , 03:46
Мом ӱдет - тудым тӱредат
Шыже тӱҥалме дене пасулаште шурным погымо сомылат мучашке лишемеш. 31 августлан ял озанлык пашаеҥ-влак 63 процент кумдык мландыште (800 тӱжем наре гектар) пырчан да пырчан-отызан кушкылым шийыныт. А погымо шурнын чумыр кугытшо 2 млн 330 тӱжем тонным эртен. Тидын нерген БР Правительствын оперативный погынымаштыже вице-премьер - ял озанлык министр Ильшат Фазрахманов увертарен. Стерлитамак, Чекмагуш, Давлекан, Аургаза, Кармаскале да Илиш районлаште 100 тӱжем утла тонн шурным шийме.
БР Ял озанлык министерствын сайтше гыч налме фото.
«ЧОЛМАН» ГАЗЕТЫМ МАX-ЫШТЕ ЛУДЫНА!
Кокияш пырчан кушкылым кундемыште чыла поген налме. Тудым чылаже 968 тӱжем тонным тӱредме. Икияш пырчан шурным 524 тӱжем гектар мландыште (планын 53 процентше) кырыме, тудым 1 млн 360 тӱжем тонным поген налме. Тыгодымак пасулаште ӱйым пуышо кушкылым - рапсым, горчицым да йытыным - погат, ӱй нӧшман кушкылым 71 тӱжем тонным шийме. Кум районын озанлыкыштыже сакырушменым погат. 2 тӱжем 350 гектар мланде гыч 75 тӱжем тонн сакырушменым налме. Пасулаште тыгак кокияш кушкылым ӱдат. 31 августлан кокияш уржам, шыдаҥым 117 тӱжем гектар мландыште ӱдымӧ, увертара Ял озанлык министерствын пресс-службыжо.
