+19 °С
Облачно
Ял илыш
18 Августа , 10:27
Тошто Чикей пеледеш, тӱзлана
Тошто Чикей калык шочмо ялжын 250 ияш лӱмгечыжым 15 августышто палемдыш. Нуно тиде пайремлан идалык тӱҥалтыштак ямдылалташ тӱҥалыныт. Погынымаште ыштышаш паша-влакым каҥашеныт, икмыняр гана субботникым эртареныт. Ял староста Минсылу Саитгалиналан оксам погаш ӱшаненыт. Ты шотышто верысе калык дене пырля моло вере илыше-влакат чот полшеныт. Шошым клуб воктене у мемориал комплексым ыштеныт.
Изи артист-влак Таисия, Ева Шангареевмыт да Мирослава Николаева. Авторын фотожо-влак.
«ЧОЛМАН» ГАЗЕТЫМ МАX-ЫШТЕ ЛУДЫНА!
Кодшо курымын 80-ше ийлаже тӱҥалтыштак ыштыме обелиск олмеш Кугу Отечественный сареш вуйыштым пыштыше, тушеч сеҥымаш дене пӧртылшӧ 120 еҥын лӱмжым возымо плита-влакым шогалтеныт. Клуб ончылно СВО-што геройла вуйыштым пыштыше салтак-влаклан банерым пижыктеныт.
Мутат уке, тыгай пайремым ямдылен да эртарен кертше вуйлатыше кӱлеш. Тошто Чикей ялыште уста организаторлан Вадим Миникеевым шотлыман. Тудо ятыр ий ял клубым вуйлата, ял старостан полшымыж дене калык дене шуко пашам ворандара. Ялым тӱзатымаште да юбилейлан ямдылалтмаштат Вадим Минлиахметовичын надырже кугу.
Илыш йогынжым ты ял дене ушышо кажне еҥ тиде кечым чон вургыжын вучен. Торашке йоҥгалтше ныжыл марла сем изижымат-кугужымат ял клуб воктенсе сылне аланышке ӱжын. Шукертсек ужаш шонымо йолташышт, пошкудышт дене поро шомакым пелештен, шочмо ял дене кылдалтше шарнымаш мундыраштым рончалтеныт. Мыняр шуко погынен йӧратыме шочмо кундемыште эртыше изи-кугу событий-влак нерген шарнымаш!
Ялын лӱмгечыж дене саламлаш район администраций вуйлатышын алмаштышыже Филюс Хакимгареев толын ыле. Мер пашаште ятыр ий тыршымылан Вадим Миникеевлан, вер-шӧрым тӱзатымаште надырым пыштымылан Минсылу Саитгалиналан районын Чап грамотыжым кучыктыш. Ялсовет администраций вуйлатыше Владимир Корочкин яллан полшен шогышо еҥ-влакым таумутан серыш дене кумылаҥдыш.
Пайремыште 50 ий да утларак пырля илыше еш мужыр-влак Юзлыбика ден Александр Давлетгареевмытым, Минлиян ден Анатолий Мрясевмытым, Балсултан ден Анатолий Канаковмытым, Часькабика ден Григорий Токмурзинмытым, кугу ийготан еҥ-влакым, Кугу Отечественный сар жапыште кушшо Елена Ташмурзинам, Гулчаська Садыковам саламлышт. Кугу Ачамланде сарыште да СВО-што ӱмыр лугыч лийше салтак-влакым шып шоген шарналтышт.
Тысе калык шочмо вер-шӧржым тӱзатен шога: рӱжге погынен, клуб йыр профнастил дене печым печеныт, кӱлдымаш пушеҥге-влакым пӱчкеденыт, шӱкшакым эрыктеныт, ончыкылык парклан верым тӧрлен шынденыт, шошым шарнымаш аллейыште пӱнчӧ-влакым шынденыт. Ял пайрем вашеш сценым йӧнештареныт, ончаш толшо-влаклан шинчаш теҥгыл-влакым, йоча-влаклан модашышт посна верым ямдыленыт.
А могай пайрем муро да куштымаш деч посна? Ял калыкым да уна-влакым верысе да тӱрлӧ район гыч толшо мурызо ден самодеятельный коллектив-влак куандарышт. Ала-кушеч толын лекше шем пылжат, йӱштырак йӱржат ыш лӱдыктӧ. Изижат-кугужат концерт мучко артист-влак дене пырля мурышт да куштышт, пайрем марий дискотека дене мучашлалте.
Жап ик верыште ок шого. Тошто Чикей ял кажне ийын пеледеш, тӱзлана да тыште илыше пашаче, тыршыше марий калыкым у тӱшка пашалан кумылаҥда.
