+20 °С
Ясно
Ял илыш
22 Июля , 08:28
Кеҥеж кече телым пукша
Кеҥеж кече телым пукша, маныт калыкыште. Мый гын тенийсе гай кеҥежым шукертсек ужын омыл. Кажне кечын гаяк йӱр чарныде ложга. Ындыже чонешак витарен шуктыш - шыже игечыла вел чучеш.
Авторын фотожо.
Тений игече вольыклан шудым ямдылаш йӧным ок пу. Юмылан тау, шудо моткоч сайын кушкын, а теве тудым жапыштыже поген налаш ок лий. Сандене, вольыклан телылан кургым ситышын ямдылен кодаш манын, сай кечым гына огыл, кажне шагатшым пайдалын кучылташ перна. Шуко еҥже коштымо валок-влакым пресс-подборщик дене рулоныш чумырен шуктеныт. Пасу мучко йыргешке рулон-влак койыт, вет ямде шудым оралтышкышт шупшыктен кертдыме-влакат улыт. А кӧн шкенжын техникыже уке але вараш кодын гын, солымо шудышт пакосышто шемем кия (Кызыт шудым ыштымаште эн кӱлешан техника - трактор. Трактор дене солат, удырат да прессоватлат).
Йӱран игечылан верч шудым ямдылыме пагыт кужун шуйна. Еҥ-влакат вуй ӱмбакышт кугу ӱшан дене ончалыт, шем пыл олмеш яндар, канде кавам ужнешт. Но уке. Пӱртӱс калыклан пареҥгым шындаш поро игечым пуыш, а шудым солаш, вольыклан кургым ямдылаш пеш йӧсӧ. Теве волгенче волгалтеш, кӱдырчӧ рашкалта. Эрлашыжым адакат йӱштӧ йӱр шыжа. Икманаш, игече игылтеш.
Интернет лишыл жапыште шокшо да ояр кече-влак лийшашым ончыкта. Июль мучаш марте 25-28 градус шокшым сӧрат. Тек пӱртӱс тиде кечылаште шудым ситышын ямдылаш ыҥгайлыкым пуа, вет ял калыкын телым кузе илен лекшашыже игече дечат шога.
