Сай улат, ял калыкем!

Тиде кечым мотор деч мотор вургеман ял калык, толшо уна-влак, ик ешла погынен, чон почын кутырен, мурен-куштен эртарышна. Пеш поян ӱстел сийым погымо ыле. Мыят кӧстенечым намийыде шым чыте. Пайремым марий муро ден куштымаш сӧрастарышт, модыш-влакым эртарышт.  Еш илыш дене йыргешке ийготым илыше мужыр-влаклан саламлыме мут йоҥгыш, нунылан шарнымаш пӧлекым кучыктышт. Вашлиймашым эртараш полшышо-влакым, тыгак мӱндыр верла гыч толшо артист-влакымат палемдыде ышт кодо. Пайрем элысе калык-влакын ваш келшен илымыштым, шочмо верым йӧратымашым чапландарыш, шочмо йылмынам да марий йӱланам арален коден, тидлан самырык тукымымат кумылаҥдыме шонымаш дене эртыш.  Пайремым ямдылыше да эртарыше-влаклан пеш кугу тау.  Таза-эсен лийын, кок ий гыч адакат  пырля вашлияш ойым пидыч.