Суртвольыкым кузе арален кодаш

Вакцинаций 

Шошым кажне ийын суртвольыклан вакцинацийым ыштат. Жапыштыже ыштыме вакцинаций - тиде вольыкым сибирский язва, бешенство, бруцеллез, инфекционный ринотрахеит да моло лӱдыкшӧ чер деч ӱшанле аралтыш. Тылеч посна вакцинаций вольыкын иммунитетшым пеҥгыдемда, чер ваштареш чытышанрак лияш полша. Шарныза: южо лӱдыкшӧ чер-влак огыт эмлалт да колымашке шуктен кертыт. 

- Кугыжаныш ветеринарный служба личный подсобный да фермер озанлык-влакын озаштлан вольыкым да кайыкым кӱлеш ветеринарный документ деч посна ужалыше-влак налаш ок шӱдӧ (поснак интернетысе социальный сайт, мессенджерласе увертарымаш гоч). Нине вольык эпизоотический ситуаций шотышто сай огыл регионла гоч кондымо лийын кертыт. Вольыкым вес регион, эсогыл воктенсе район гыч ветеринарный служба дене каҥашыде налман огыл. Налаш темлыме вольыкым легально кондымым тергашлан районысо ветеринарный службышто рашемдыза, - ойла Башкортостан Республикысе ветеринарий шотышто кугыжаныш комитетын вуйлатышыже Азат Зиганшин. 

Вольыкдалан вакциным ышташ участковый ветеринар деч йодман. 

50% скидкан страховка

Российыште вольыклан страхований шотышто кугыжаныш программа пашам ышта. Тушто тӱҥжӧ - кугыжаныш ял озанлык сатун производительже-влаклан страховкын пел акшым компенсироватла. 

Кугыжаныш полшымо дене тӱкан шолдыра волькым (буйвол, ӱшкыж, вол, ушкал, як), тӱкан тыгыде вольыкым (каза, шорык), сӧснам, имньым, верблюдым, пӱчым, кроликым, кайыкым, эсогыл мӱкшым страховатлаш лиеш. Тыште ик ойыртем уло: улшо чыла вольыкым страховатлыман. Тендан 100 ушкалда гын, иктым, визытым але луым гына страховатлаш ок лий, улшо чыла 100 вуй вольыкымат страховатлыман. 

Агростраховщик-влакын национальный ушемыштышт каласкалымышт почеш, кугыжаныш вольыкым тыгай туткар лийын кертме страховкым ышташ полша: 

• сӧсна-влакын африканский чумашт, кайык грипп, ящур да куснышо моло 62 черлан кӧра колымаш; нине черлан кӧра ветеринарный служба-влакын пытарашлан вольыкым поген налмаш. Тичмаш спискым 2013 ий 24 июньысо РФ Ял озанлык министерствын 242-шо номерысе приказыште ончалаш лиеш;
• тӱшка отравлений;
• пӱртӱс азап;
• пожар.

Договорым ыштыме годым тушеч иктыжым, икмыняр але чыла азапшым ончыктен кертыда.

«Страховой компаний-влакын вольыкым ончышо-влакын ветеринарий шотышто сай огыл районышто лийын кертме азапым приниматлыме деч кораҥаш правашт уло. Страхований нерген решенийым жапыштыже приниматлаш кӱлеш», - рашемдат Агростраховщик-влакын национальный ушемыште (НСА). 

- Кугыжаныш полшымо дене аккредитоватлыме компаний - НСА-н еҥже-влак гына - страховатлен кертыт. Нунын условийыштым таҥастарыза да шкалан келшыше вариантым ойырыза. Компанийын Башкирийыште еҥже улмым рашемдыза, - каласкала ВСК страховой пӧртын Уфасе филиалжын вице-президентше Азат Бакиров. - Кызыт полисын акше пешак кугу огыл. Пазарыш шылым ужалыме пӧлкаш миен савырныза. Килограмм шыл мыняре шога? 700 теҥге наре. Страхований йылмыш кусараш гын, ик ушкалым страховатлымаш - тиде ик кило шыл ак.  

Компаний дене условийжым каҥашыза: могай азап-влак, страховой ак да франшиза. Страховщикын ял озанлык пашаеҥлан зиянлан тӱлыдымӧ ужашыжым тыге маныт. Тудо страховой акын 30 процентше марте шуын кертеш. Франшиза мыняре шукырак, страховой выплатыже тунаре шагалрак. Тулеч вара тыланда йодмо акын пелыжым тӱлыман лиеш, да договор вийым налеш. Акын кокымшо пелыжым кугыжаныш страховой компанийлан шкеак колта. 

Кокла акшым calculator.naa.ru страховой калькулятор полшымо дене шотлаш лиеш. 

Налме оксадан кугытшо могай условийым ойырымыда, тыгак мыняр вольык колымо деч шога. Мутлан, тендан 200 вуй ушкалда уло, пожарыште лу ушкалже колен. Те оксам чумыр кугытшо деч чогыл, а кажне ушкаллан шотлымаште налыда. 

- 2025 ийыште ял озанлык вольыкын агрострахованийжылан 56 миллион теҥге оксам кучылтыныт. Республикыште 53 тӱжем тӱкан шолдыра вольыкым, 448 тӱжем вуй сӧснам, 3,3 миллион кайыкым страховатлыме, каласкалышт республикысе ял озанлык министерствыште. 

Тыглай еҥлан страховка

Эше ик кӱлешан тат. Кугыжаныш полыш сельхозтоваропроизводитель-влаклан гына (регистрироватлыме юрлица-влак: ИП, КФХ, ООО да молат) пашам ышта.  Кова ден коча ушкал ден казам ашнат да нуным страховатлаш шонат гын, полисын пел акшын кугытшым нунылан огыт пӧртылтӧ. Тиде страхованийын вес видшылан шотлалтеш, «Страхование сельхозживотных» маналтеш. Полис тыглай еҥ-влаклан - ушкалым, ӱшкыжым, имньым да казам ашныше оза-влаклан - келшен толеш. Вольык кола але тудым шолыштыт гын, компаний окса компенсацийым тӱла: тыге вес вольыкым бюджетлан уто нелыт деч посна налаш лиеш. Районыштыда могай страховой компаний-влак пашам ыштыме нерген шкендан администрацийыште пален налаш лиеш.