Мондаш лийдыме шарнымашым кодыш

Нуным Акпарс ялсоветын вуйлыкшо Р.Г. Ягудин шокшын саламлыш. Акпарс ялын кум эргыжын, кызыт СВО-што служитлыше кадровый офицер-влакын аваштлан район Совет лӱм дене таумутан серышым кучыктыш да каласыш: «Те сай эрге-влакым ончен куштенда, нуным Шочмо элым аралаш, авам йӧраташ туныктенда, шкежат сеҥымашым лишемдаш полшеда. Тыгай патыр да лӱддымӧ эрге-влакым ончен куштымыланда тау!» 

«Тений Аван кечыже поро кумылым да пырля улмым ончыктымо шӱлыш дене эрта. Жап тыгай - элым аралаш кӱлеш, пӧръеҥ-влак фронтышто кредалыт гын, ӱдырамаш-влак тыл гыч полшат. Тыге веле сеҥымашым писынрак лишемдаш лиеш. Мый тыланда тазалыкым, чытышым, сеҥымашлан ӱшаным тыланем», - залыште шинчавӱдым йышт ӱштын шинчыше ава-влакым саламлыш школ директор Г.Ф. Габдрахманова.

Тунемше-влак ава нерген муро-влакым йоҥгалтарышт, шӱмеш логалше почеламут-влакым лудыч, сылне куштымашышт, оҥай сценкышт дене куандарышт, уна-влаклан шке кид дене ямдылыме открыткым кучыктышт.

Акпарс калык СВО-што улшо землякше-влаклан полша. Вес семынже огешат лий. Ӱдырамаш-влак, тӱшкан погынен, школын спортзалыштыже маскироватлыме сетьым, шокшо носким пидыт, витамин чайым, окопышто пайдаланыме сортам ямдылат, гуманитар грузым чумырат. Пайрем кечын, шке жапыштым чаманыде, салтак-влаклан полшышо волонтер-влакымат таумут дене палемдышт.

Эн сай да мондалтдыме тат, пырля погынен, чайым йӱмаш лие. Чыланат икте-весе дене мутланен шинчышт, тӱрлӧ конкурсыш да модмашке ушнышт.

А 30 ноябрьыште предприниматель Н.М. Давлетова ава-влакым «ДЮНА» кевытышкыже чумырыш. Надежда Мурзагареевна кажне ийынат Аван кечыжым шке шочмо ялыштыже эртара, ӱдырамаш-влакым пайрем дене саламла. Теният, «Поро подписка» благотворительный акцийыш ушнен, ава-влаклан 2026 ийын икымше пелийжылан «Чолман» газетлан подпискым пӧлеклыш. Погынышо-влакат Н.М. Давлетовам Уфаште «Наш бренд» тӱнямбал фестивальыште шӧртньӧ медальым сеҥен налмыж дене саламлышт да пеледыш аршашым кучыктышт.

Чынжымак, Аван пайремже Акпарсыште поро шӱлыш дене эртыш, мондаш лийдыме шарнымашым кодыш.