«Кеҥежым ужатышна, телылан ямде улына»

Тений вондо кошкымылан кӧра пареҥгым эр лукташ тӱҥальыч. Лектышыже ял калыкым куандарыш, поснак ош тӱсанже пеш умыш.  Южо оза вес ийлан пакчамат иземдаш шонен пыштыш. Пареҥге кажне ийын тенийсе гай ок умо. Шошым покшым ыш лий, а кеҥежым чӱчкыдын йӱр йӱрӧ. Ял йыр шудат пенсионер-влаклан солаш йӧрыш. Кеҥеж емыжлан, пакчасаскалан поян лие. Осал йӱр-влак ялнам эртен кайышт.

Телым клубышто икмыняр погынымашым эртарышт. Ыштышаш паша нерген мутланышт, изиш оксам погышт. Телым пунчалме чыла паша кеҥежым ышталте. Огаш эҥерын кӱшыл серыштыже шогышо обелискым уэмдышт, шӱгарлаште печым вашталтышт. Кок ий сото телефонлан вышкым шогалтыме шотышто мутланышт. Тений ял воктенсе кӱкшакаш вышкым вераҥдышт.  

Ӱткӱстыштӧ илыше калык телым вашлияш ямде. Шудым вӱта воктеке шупшыктен ситарышт. Пум пӱчкын, пӧрт воктене артанаш оптышт. Шукын пӧртым газ дене ырыктат. Ынде ик кугу пашана гына кодын. Ял покшеч Огаш эҥер йога, а кӱварже тоштемын. Тиде кӱварым вес ийыште уэмдаш пунчалым ыштыме. Ял калыклан тазалыкым, ял-влаклан кужу ӱмырым тыланена.