-28 °С
Пылан
Все новости
Ял илыш
1 Шыжа 2025, 13:26
Тӱшка пашан лектышыжат тӱвыргӧ
Cентябрь мучаште Акпарс ял калык верысе шӱгарлам эрыкташ рӱжге субботникыш лектын. Тӱшкан погынен, ялче-влак пече йыр да шӱгарла кӧргыштӧ кеҥеж мучко погынышо шӱкшудым соленыт, кошкышо воштыр-влакым чумыреныт, тӱрлӧ вере кушкаш тӱҥалше изи пушеҥге-влакым пӱчкеденыт.
Субботникыш лекше калык. Авторын фотожо-влак.
Субботникыш 25 еҥ погынен, паша чылалан ситышын лийын. Пӧръеҥ-влак триммер дене шудым соленыт, шаньык дене прицепыш оптеныт, ӱдырамаш-влак шорвондо дене удыркаленыт. Чылаже 20 прицеп шӱкшакым луктын кышкыме. Еҥ-влак чылан сайын, тыршен ыштеныт. Поснак Роман Габдуллин шке машинаже да прицепше дене, Вадим Исламов «Муравей» мотоциклже дене кугун полшеныт. Нуно шке техникышт дене куштырам шупшыктеныт. Коклаштышт Дмитрий Атнабаевымат палемдыман. Тудо шке мотоблокшо дене кугу территорийым солен лектын. Субботникыш толшо-влак пашам уло кумылын ыштеныт, йырым йыр чумыр кумдыкым эрыктен шынденыт. Паша деч вара землячкына Н.М. Давлетова чылаштымат шокшо чай да когыльо дене сийлен.
Акпарс ял калык икоян. Нуно идалыклан кок гана шӱгарлам эрыкташ коштыт, шошым да шыжым субботникым эртарат. Кугезына-влакын эрелан верланыме мландыштым эрыкташ - мемнан порысна.
Новости партнеров