-28 °С
Пылан
Все новости
Ял илыш
13 Сорла 2025, 12:43
Пасулаште шурным погат, вольыклан кургым ямдылат
Тачысе кечын республикысе пасулаште тӱҥ сомыл - уржа-сорла. 11 августлан Башкортостаныште пырчан да пырчан-отызан кушкылым погышаш чумыр кумдыкын 17,5 процент мландыштыже солен налыныт. Тиде тӱҥ шотышто кокияш кушкыл-влак. Шурным чумыржо 240 тӱжем утла гектар мландыште шийыныт.
БР Ял озанлык министерствын сайтше гыч налме фото.
Башкортостан Республикын вице-премьерже - ял озанлык министр Ильшат Фазрахмановын мутшо почеш, шурно лектыш 860 тӱжем тонныш шуын, тушеч 512 тӱжем тоннжым ик арняште поген налыныт. Кокла шурно лектыш гектар гыч 35,7 центнерыш шуын (2024 ийыште - гектар гыч 31,7 центнер). Уржа-сорла тургымым чыла гаяк районлаште тӱҥалыныт. Пырчан да пырчан-отызан культура-влакым шийме шотышто эн сай лектыш дене Стерлитамак (84,8 тӱжем тонн), Аургаза (79 тӱжем тонн) да Кармаскале районласе (66 тӱжем тонн) озанлык-влак ойыртемалтыт.
Погымо шурным республикысе 34 элеватор ден ял озанлык предприятий-влакын складышт аралаш тӱрыснек ямде улыт. Нуно иканаште 4 миллион наре тонн пырчан да ӱйым пуышо кушкылым шыҥдарен кертыт.
Ял озанлык пашаеҥ-влак тыгак шушаш 2026 ийлан кокияш кушкыл-влакым ӱдаш тӱҥалыныт. Тиде пашам 8 районысо озанлыклаште шуктат. 11 августлан 1 тӱжем 650 гектар кумдык мландым ӱденыт.
Тылеч посна республикыште вольыклан телылан кургым ямдылат. Чоштыра да нӧргӧ кургым 512 тӱжем гектар кумдык мландыште (ямдылышаш планын 87 процентше) соленыт, увертара БР Ял озанлык министерство.
Новости партнеров